La cursa da stad en Engiadin'Ota è sa sviluppada durant ils davos onns ad in vair festival. Sut il titel «Running festival San Murezzan» è la cursa ozendi ina da pliras cursas ch'ins po far durant il festival. Quel cumenza gia il venderdi cun ina cursa da trailrunning, cun il Trail da Glüsch davent da Bever sur la Corviglia fin a San Murezzan Bogn.
La sonda spetga alura la cursa verticala Free Fall, sin la partenza da la cursa rapida durant il campiunadi mundial da skis. E la dumengia alura tranter auter la cursa roiala, cun la cursa da stad sur 25 kilometers da Segl a San Murezzan Bogn.
Onn da record 2019
Alura ha la cursa da stad en Engiadin'Ota pudì festivar ses giubileum da 40 onns. Il giubileum ha attratg 2’500 curriduras e curridurs. Suenter è vegnì la pandemia da corona e dapi quella han tut las occurrenzas da cumbatter cun il numer da participantas e participants. La cifra è oz per la mesadad pli pitschna. Tuttina è ins cuntent en l’organisaziun dal Running Festival a San Murezzan. Sche 1’300 persunas vegnan a la cursa, alura vegnan quellas per pli cun in partenari e restan ina u duas notgs en la regiun. Uschia generescha la cursa svelt 3’000 fin 4’000 pernottaziuns. Quai ch’è fitg bler.
Cursas senza incaps
Il Running Festival da San Murezzan è stà in success. Sa chapescha era perquai ch'i n’ha betg dà problems pli gronds. Sco adina era l’aura magnifica. Quai gida enorm. Speras èn quasi tuttas e tuts vegnids saun e salvs en l’arrivada a San Murezzan Bogn.
