Sandro Simonet ha mussà ina cursa solida senza gronds sbagls, dentant cun bunamain quatter secundas retard pers memia bler temp per pudair cumbatter per ils emprims puncts da la cuppa mundiala en quella stagiun.
Igl è gia stà la 7avla giada che Sandro Simonet è partì al slalom dad Adelboden. Sis giadas n’ha il temp betg tanschì per il segund percurs, ina giada il 2022 è el crudà ora en il segund percurs. La schanza da far meglier survegn il skiunz da 27 onns gia en in’emna al proxima classicher, il slalom da Wengen.
Da Casti ad Adelboden
Sustegn ha Sandro Simonet er gì ad Adelboden da ses Club da fans. Cun in car han radund 20 commembers dal club da fans fatg il viadi la damaun baud da Casti ad Adelboden. Suenter la cursa datti in sa vesair cun lur atlet per dar ina baterlada avant ch’ils fans han puspè da turnar a chasa.
Il Club da fans da Sandro Simonet ha bun 100 commembers ed è vegnì mes sin pes avant bun dus onns. Dapi bun in onn accumpognan els Sandro Simonet ha diversas cursas da la cuppa mundiala, principalmain a las cursas da chasa.
