A la fin dad ina lunga stagiun da skis anc ina giada in success. Als campiunadis svizzers da skis a San Murezzan ha Selina Egloff da Scuol gudagnà il titel en il slalom. Uschia defenda la skiunza engiadinaisa da 24 onns ses titel gudagnà la stagiun passada.
Selina Egloff n'era segir betg la pli gronda favurita. Tuttina era ella la pli sperta gia suenter l’emprim percurs, ed ella ha defendì quest avantatg fin a la fin. Segunda è vegnida Aline Danioth e terza Eliane Christen. Wendy Holdener è vegnida tschintgavla.
Buna fin dad ina lunga stagiun
La gronda part da la stagiun ch’è ida a fin ha Selina Egloff passentà en la cuppa europeica. Be tschintg giadas ha ella pudì ir durant questa stagiun a la partenza da cursas da la cuppa mundiala. Ma puncts sin il pli aut nivel n'hai betg dà per la skiunza da Scuol.
Auter è quai stà a las cursas da la cuppa europeica. A Sundsvall-Nolby, il principi da favrer è ella vegnida terza en il slalom.
Igl è be ina cursa – ma i fa enorm bain ch'igl è oz ì si anc ina giada.
Il titel da campiunessa svizra a la fin da la stagiun fa uschia segir bain e motivescha da cumenzar lura suenter las vacanzas da primavaira cun il trenament per la proxima stagiun.