Per il CDH Engiadina è la stagiun da hockey a fin. L’equipa da l’Engiadina Bassa ha era pers la segunda partida da quart final encunter Kreuzlingen-Konstanz ed è perquai crudada or da la decisiun. Il CDH Engiadina ha propi empruvà e fatg dal tut per gudagnar la segunda partida da la seria da playoff e sfurzar Kreuzlingen-Konstanz en ina finalissima. A la fin na ha quai dentant betg tanschi, il CDH ha stuì ceder e po uss planisar las vacanzas.
CDH Engiadina ha cuntanschi la finamira playoff
Gia ina partida avant la fin da la qualificaziun ha il CDH Engiadina sa qualifitgà per ils playoffs. Il CDH ha terminà la qualificaziun sin plazza tschintg, quai ch’è il meglier resultat dapi blers onns. Cun la qualificaziun per ils playoffs e gest era segir che l’equipa po dar er la stagiun che vegn en segunda liga. Quai era la finamira principala da l’equipa da l’Engiadina Bassa. Ch'i vegnia dentant ad esser grev en ils playoffs era tschert davent da l’entschatta.
Blers ferids ed equipa fitg giuvna
Davent da l’entschatta dal campiunadi en segunda liga ha il CDH Engiadina stuì cumbatter cun feridas. Fin il davos mancavan a l’equipa passa in maun plain giugaders da tschep, quai ch'ha fatg vegnir fitg difficil la situaziun. La davosa partida da playoff ha il trenader Benny Wunderer stuì dar cun quatter giugaders pli giuvens che 18 onns, e cun set giugaders ch’èn pli giuvens che 21 onns. Il cader dal CDH Engiadina era davent da l’entschatta dal campiunadi in dals pli giuvens da l’entira liga. Perquai mancava a la fin segira l’experientscha. Quella crescha dentant cun mintga seria da playoff che l’equipa sa dar.
