Cun ina clera victoria l'ultima fin d'emna dad 8:0 cunter la segunda equipa dal FC Domat ha l'emprima equipa da la US Schluein Glion fatg cler la promoziun en 2. liga. Ils tiradurs da gol èn Lars Caduff e Lars Zala cun mintgamai trais gols. Timo Cavegn e Rafael Deplazes cun mintgamai in gol.
Il sulet concurrent en la terza liga, Mels, ha numnadamain dà be pari 0:0 cunter Walenstadt e na po betg pli surpassar ils Sursilvans. Uschia è gia tut cler avant l'ultima partida da la stagiun da proxima sonda cunter il FC Gams a Crap Gries – l'USSI dat per la terza giada da sia istorgia en la segunda liga.
«I munta fitg bler che nus avain cuntanschì cun ina squadra indigena, cun ina squadra che quasi tuts discurran rumantsch, cun ina squadra fitg giuvna», ha ditg il manader da sport da Schluein Glion ditg en il discurs cun RTR.
Ils rutiniers han purtà e motivà l'equipa ed ils giuvens han fatg part. Uschia è gartegià insatge extraordinari.
L'equipa giuvna ha mussà durant tut il campiunadi ina prestaziun impressiunanta ed ha da fin ussa 21 gieus pers mo dus e giugà in pari. En 18 gieus è il team partì sco victur davent da la plazza ed ha sajettà en tut 77 gols.
Era il president Thomas Müller è fitg cuntent cun la prestaziun, ha el ditg en l'intervista cun la FMR.
Nus avain grond plaschair. Sin quest mument avain nus spetgà ditg. La promoziun dat nov anim per l'avegnir. Quai vala surtut er per ils giugaders giuvens.
Ils giuvens sajan quels che guardian si sin ils giugaders da l'emprima equipa. Plirs dad els s’engaschian er en ils trenaments dals juniors sco assistents, cuntinuescha Thomas Müller. Ed ils giuvens sajan era aspectaturs fidaivels, sco per exempel la dumengia suentermezdi a Domat.
-
Bild 1 von 4. Bildquelle: Jan Kretz, JK Media.
-
Bild 2 von 4. Bildquelle: Jan Kretz, JK Media.
-
Bild 3 von 4. Bildquelle: Jan Kretz, JK Media.
-
Bild 4 von 4. Bildquelle: Jan Kretz, JK Media.
Media da 21 onns
Plirs giugaders da tschep avevan terminà l'onn passà lur carriera activa. Uschia è l'equipa spezialmain vegnida cumplettada cun giugaders giuvens. Ils leaders da l'equipa è il bloc enturn il capo-tiragols Lars Caduff, Lars Zala u Rafael Deplazes. En media ha il cader da la US Schluein Glion ina vegliadetgna da strusch 21 onns.
Igl è in'equipa fitg giuvna, ina cun bler'energia e motivaziun. Quella sa sa sviluppar vinavant. Fin ch'els èn 23 u 24 onns vegls vegnan els anc a far in grond progress.
Las aspectaturas ed ils aspectaturs dastgan puspè sa legrar sin ballape da segunda liga a Crap Gries. La nova stagiun cumenza la fin d'emna dals 15 e 16 d'avust, lura cura che la USSI dastga era festivar l'inauguraziun dal nov pastget artifizial a Glion Fontanivas.
La squadra cun ils trenaders Mirco Zala, Kurt Dietrich e Damian Arpagaus resta, sco era Anna-Lea Spescha che procura per l’atletica en las preparativas, ha ditg Thomas Müller, president da l'USSI, envers la FMR. Da la squadra sa retiran Tiziano Vinzens ed il goli Flurin Capaul. Els èn stads blers onns impurtants giugaders da tschep.
Or da l'archiv:
Gia la stad da l'onn 1990 han las gasettas scrit: «L'Uniun sportiva da Schluein dastga avanzar en la segunda liga». Il Telesguard ha preschentà il club da ballape da Schluein ch'ha gia ina lunga tradiziun.