Ils represchentants da la vischnanca, da l'Uniun sportiva Schluein/Glion (USSI) e da las firmas da construcziun participadas han dà glindesdi l'emprima palada per la nova plazza da ballape da Glion che sa chatta a l'intern dal bogn Fontanivas. Il terren sut il pastget artifizial vegn emplenì cun granulat da badugn. Igl è l'emprima plazza en Svizra realisada cun tal granulat.
«Nov tar nus – ma cumpruvà a l'exteriur»
Thomas Müller, il president da l'USSI, ha argumentà a chaschun da l'emprima palada, pertge che l'Uniun sportiva Schluein Glion è sa decidida per quella soluziun. «L'applicaziun dal granulat da badugn tutga tar las innovaziuns las pli actualas sin il sectur da la construcziun da plazzas da sport. Nus essan fitg engraziaivels che nus survegnin la pussaivladad da construir il plaz cun quest material.»
En la communicaziun a las medias scriva l'USSI ch'en ils pajais da l'Europa dal Nord saja il diever dal granulat da badugn cumpruvà ed en installaziuns da test a Sheffield en l'Engalterra saja quest material vegnì taxà sco fitg adattà.
Senza microplastic
Gian Arpagaus, il manader dal project a Glion Fontanivas, ha ditg che l'USSI realiseschia sin quest terren ina plazza da ballape sco soluziun persistenta che persvada tant per il sport sco era ord il punct da vista ecologic.
Il granulat da badugn è neutral al clima e cumplettamain decumponibel.
«E en cas ch'ins na dovra betg pli il plaz artifizial pon ins returnar il material a la natira e cun quai a la circulaziun naturala.» La plazza da ballape ord granulat da badugn adempleschia las pretensiuns per ina buna qualitad da gieu, è vegnì ditg durant l'emprima palada. Quellas plazzas sajan renconuschidas da la FIFA e possian vegnir duvradas tant per il sport da massa sco era per il sport d'elita.
Term impurtant per l'USSI
Ils responsabels da l'USSI han era accentuà durant l'act da partenza per la construcziun ch'il nov plaz a Glion muntia in term impurtant per il Club da ballape Schluein Glion e per la vischnanca Ilanz/Glion. L'USSI saja la pli gronda uniun da sport da la regiun che crescha ad in crescher. Ins dovria urgentamain il plaz e survegnia a Glion ina plazza da ballape che possia vegnir duvrada l'entir onn.
Glion vegnia ad esser ina basa da trenament impurtanta per l'uniun e per las equipas da junioras e da juniors dal Team Surselva sco era per la Federaziun grischuna da ballape.
Cun il plaz artifizial modern vegnan las cundiziuns per trenar e giugar meglieradas considerablamain.
Vischnanca cuntenta
La vischnanca dad Ilanz/Glion sustegna la construcziun dal plaz cun ina contribuziun considerabla da 600'000 francs plus ina garanzia da deficit da 100'000 francs. Il president communal dad Ilanz/Glion, Marcus Beer, ha ditg che la nova plazza saja ina grondiusa cumplettaziun dals stabiliments da sport gia existents a Fontanivas.
Investiziun en l'avegnir
Il nov plaz da ballape ord granulat da badugn a Glion Fontanivas custa tenor preventiv 1,7 milliuns francs. Suenter differentas contribuziuns da sustegn da la vischnanca Ilanz/Glion e dal chantun restan anc custs da 500'000 francs per l'USSI.
En la communicaziun da medias da l'uniun stat scrit che l'uniun sportiva na possia strusch finanziar quella summa senza prestar lavur cumina per 150'000 francs e senza survegnir ulteriuras contribuziuns. Il manader dal project Gian Arpagaus ha era engrazià als numerus voluntaris per lur agid cun construir il mir da basa per la tribuna d'aspectaturs.
