Il giuven skateboarder da Falera (17) fa part al cader naziunal dals juniors ed ha pudì ir a Roma ad ina concurrenza da la cuppa mundiala (World Skate) che quinta per la qualificaziun per ils proxims gieus olimpics da stad il 2028 a Los Angeles. Igl è sia emprima concurrenza sin quest livel cun ils megliers skateboarders dal mund.
Tar il sport da skateboard na datti naginas reglas, nagin che di tge che ti has ni stoss far, ins po decider sez. Igl è in sentiment da libertad e quai fascinescha mai.
Jon Welti ha cumenzà avant bun nov onns ad ir cun skateboard. Oz saja quai dentant dapli che be in hobi, di il giuven da 17 onns trenescha intensivamain e pliras giadas ad emna en l’Academia da freestyle a Laax. Là vegn tranter auter trenà da Cédric Romanens, oriund da Bienna ed enconuschent ord la scena dal sport da fun e freestyle, quai sco breakdancer, manader da project u funcziunari da sport.
Romanens tutga er tar il team che maina l’Academia da freestyle a Laax. Per Jon Welti in’infrastructura perfetga per trenar, e quai quasi avant ses isch-chasa.
Jon è adina motivà, el è in creativ, in honzeli, in ch’ha respect ed in ch’appreziescha quai ch’el ha. El è simplamain in cool tip.
Skateboards ord ils agens mauns
Il spezial – Jon Welti fabritgescha sez lur aissas, quai en la fatschenta da ses bab Urs, «Enlain» a Laax. Questa manufactura, fundada dad Urs Welti il 2017, aveva cunzunt cumenzà a fabritgar aissas da surf, lura era skis e snowboards. Uschia po Jon fabritgar ses skateboards gist uschia sco el vul e cun lur agen design.
Quai è propi cool che Jon po fabritgar tar nus sias aissas ed el è pli probabel il sulet che va cun in skateboard fabritgà sez, quai è insatge unic.
Emprendissadi da lennari
Jon Welti è il mument en il segund onn d’emprendissadi da lennari, quai tar la firma Camathias a Laax. È là ha el grond sustegn e survegn adina puspè temp liber per ir a trenar. Per la firma saja simplamain impurtant che tut saja reglà bain, di il mainafatschenta Carli Camathias. Er sch’i saja magari bler cun ir a luvrar, ir a scola e trenar, fin ussa haja quai funcziunà bain, di Jon Welti. Metter tut sin la carta sport n’è betg vegnì en dumonda.
A glieud giuvna ch’ha interess ed er il talent èsi sco fatschenta da sustegnair e dar la schanza.
Il siemi da Jon Welti è da sa qualifitgar in di per ils gieus olimpics. Sch’i na grategia betg cun Los Angeles 2028, lur simplamain quatter onns pli tard. La via è dentant anc lunga e dira. E sulet cun il talent ed il trenament n’èsi anc betg fatg, i dovra era in zic il cletg, cunzunt er da star sauns.
Jau na crai betg che Jon ha tema, jau schon. Mo jau dastg er ver tema, jau sun la mamma. E perquai na guard jau betg savens sias concurrenzas live.
Jon Welti è gia vegnì franà pliras giadas da blessuras. Uschia ha el gia rut omadus clavigls, la batschida, stgarpà la spletga e gì pliras scurladas dal tscharvè. Dar si n’è dentant mai stà in’opziun. La devisa è; star si e far vinavant.
Or da l'archiv:
