Siglir tar il cuntegn

Header

audio
Mauro Caviezel: «Far il meglier ord la situaziun»
Or da Actualitad dals 26.06.2020.
laschar ir. Durada: 03:19 minutas.
cuntegn

Ski alpin Mauro Caviezel: «Cun mai vai detg bain»

Bun trais mais suenter ses pli grond success da la carriera è Mauro Caviezel puspè giun plaun. Il skiunz grischun è vegnì franà d’ina blessura, in’ulteriura blessura en sia carriera. Durant in trenament da cundiziun a Cuira ha Caviezel stgarpà la tarschola d’Achilles.

Avant 10 dis è Mauro Caviezel vegnì operà vid il pe. L’operaziun saja gartegiada ed el haja cumenzà bain cun il temp da reabilitaziun, ha Caviezel ditg envers RTR. Durant che ses collegas d’equipa van a trenar ils proxims dis l’emprima giada sin la naiv è Mauro Caviezel dentant sfurzà da far terapia ed avair pazienza.

Malgrà questa frida mira Mauro Caviezel cun optimissem vers la proxima stagiun. El saja da buna speranza che tut vegni bun, er sch’el na vegni betg da sa preparar ideal sin la stagiun 2020/2021 cun il punct culminant, il campiunadi mundial il favrer a Cortina d’Ampezzo.

Dar si na vegn betg en dumonda

Mauro Caviezel sa co ir enturn cun blessuras. En sia carriera ha el gia rut quasi tut quai ch’ins po rumper en in carriera d’in skiunz. Tranter auter ha el sfratgà il 2011 in schanugl e blessà ina spatla ch’el era sa tschentà en ina sutga da rodas. Ses medi aveva profetisà da lezzas uras ch’el na vegni mai pli a pudair pratitgar sport da prestaziun. Caviezel ha dentant mussà il cuntrari ed ha cumbattì per ses siemi ch’el ha la finala er realisà. Dapi intgins onns auda il skiunz da Lai tranter la crème de la crème da la cuppa mundiala. La stagiun passada ha el gudagnà sia emprima rucla da cristal sco meglier skiunz en la disciplina super-g. Quai success ha er purtà dacurt a Mauro Caviezel il titel sco sportist grischun da l’onn 2020.

Actualitad 17:00

Artitgels legids il pli savens

Scrollar a sanestra Scrollar a dretga