Siglir tar il cuntegn

Header

audio
Armon Orlik davart la stagiun da quest onn senza lutga
Or da Actualitad dals 12.08.2020.
laschar ir. Durada: 3 minutas 35 Secundas.
cuntegn

Stagiun da lutga 2020 Ina pausa sfurzada gist en il dretg mument

Il Coronavirus ha bittà la stagiun da lutga da l’aua giu. Quest onn na datti naginas festas da lutga. Ina frida betg sulet per ils lutgaders, mabain per tut ils pertutgads e fans da lutga. Uschia na po er Armon Orlik betg sa mussar en il resgim en questa stagiun.

Per Armon Orlik da Maiavilla vegn questa pausa dentant gist en il dretg mument. L’onn passà ha el numnadamain gì intgins problems cun il dies e ditg er stuì tremblar d’insumma pudair sa participar a la Festa federala da lutga a Zug.

Jau hai uss propi pudì sa revegnir ed er gì peda d’ina gia far auters patratgs, uschiglio hajan ins adina mo la lutga en il chau.
Autur: Armon Orlik lutgader

Malgrà ina stagiun senza festas da lutga n’èsi betg vegnì lungurus ad Armon Orlik. El ha uschia gì dapli peda per ses studi d’inschigner ch’el ha cumenzà avant intgins onns. Plinavant ha el frequentà questa stad in praticum a Landquart, nua ch’el po uss er gidar a planisar la nova halla da lutga a Vaz Sut.

Distanza dal sport da lutga

Armon Orlik trenescha sa chapescha vinavant, quai dentant betg en quella dimensiun sco ils onns passadas. El haja propi reducì il pensum da trenament e prendì in zic distanza dal sport da lutga. Ma cler, ils cumbats en il resgim e l’atmosfera a las festas da lutga, quai manchia schon, uschia il lutgader da 25 onns.

Ses giavisch è ch’i dettia l’onn proxim puspè ina stagiun da lutga tut normala, senza Corona e prescripziuns. Sche quai è lura propi pussibel, gliez stat anc scrit en las stailas, da quai è er il meglier lutgader grischun conscient.

Actualitad 07:00

Artitgels legids il pli savens