Il Talian Fabian Rabensteiner e l’Austriac Daniel Geismayr han triumfà al Swiss Epic ch’ha manà quest onn per la quarta giada tras il Grischun, quai en las regiuns d’Arosa, Laax e Tavau. Quest duo ha gudagnà quatter da tschintg etappas ed uschia er il classament general. A la fin han Rabeinsteiner e Geismayr gì in avantatg da 7:32 minutas sin il duo tudestg cun Martin Frey e Simon Stiebjahn.
Tant per Fabian Rabeinsteiner sco er per Daniel Geismayr il segund success al Swiss Epic. L’Austriac aveva gudagnà l’ediziun 2017 en il Valleis ensemen cun il Tudestg Jochen Käss ed il Talian aveva gudagnà l’ediziun 2019 en il Grischun ensemen cun ses cumpatriot Michele Casgrande.
Dus Grischuns sut ils top 10
Ils megliers svizzers a quest Swiss Epic 2022 èn er gist dus Grischuns. Fadri Barandun da Samedan ha terminà la cursa extrema sin il 6avel plaz. Ensemen cun il Tudestg Vinzent Dorn ha el pers 32:41 minuta sin ils victurs. Gist davos Barandun è Andrin Beeli da Sagogn classà sco 7avel. El ha pers ensemen cun Frans Claes da la Belgia 48:49 minutas sin il duo Talian-Austriac. Ils dus mountainbikers grischuns èn ils sulets umens svizzers sut ils top 10. La sonda, ils 27 d’avust, partan omadus lura en l’Engiadina al Bike Maraton Parc Naziunal.
Duo tudestg betg da franar
Quai che Rabensteiner e Geismayr èn stads tar ils umens èn las Tudestgas Bettina Janas ed Adelheid Morath stadas tar las dunnas. Er ellas han gudagnà quatter da tschintg etappas e la finala er il classament general, quai cun in avantatg da 15:34 minutas sin la Svizra Janina Wüst ch’è stada a la partenza ensemen cun la Taliana Debora Piana. Manchentà il podest sco quart ha la Grischuna Alessia Nay. La mountainbikera da Zezras ha ensemen cun Antonia Bünter pers 2:15:20 uras sin il duo tudesg.
Resultats Swiss Epic 2022
5. etappa: Tavau – Tavau (58 km / 1850 m)
Il Talian Fabian Rabensteiner e l'Austriac Daniel Geismayr èn enavos sisum il podest. Suenter ch'els avevan stuì sa cuntentar cun il terz plaz en la quarta etappa da Laax a Tavau ha quest duo gudagnà la 5avla e davosa etappa dal Swiss Epic. Tar las dunnas stattan per l'emprima giada Vera Looser da la Namibia e Kim Le Court da Mauritius sisum il podest. Ellas han battì en la davosa etappa las duas Tudestgas Bettina Janas ed Adelheid Morath per passa sis minutas. Il duo tudestg aveva gudagnà las emprimas quatter etappas en roda.
Top prestaziun dals Rumantschs
Fadri Barandun da Samedan e ses collega tudestg Vinzent Dorn han terminà la 5avla etappa sin il 5avel plaz, quai cun in retard da be 4:29 minutas sin ils victurs. Gist davos Barandun ha Andrin Beeli da Sagogn e ses collega Frans Claes da la Belgia cuntanschì l'arrivada a Tavau sco 6avels, quai cun in retard da 5:32 minutas.
4. etappa: Laax – Tavau (100 km / 2800 m)
Gudagnà l’etappa ha il duo tudestg cun Martin Frey e Simon Stiebjahn, quai en in sprint final tranter trais equipas, tranter quellas er il Talian Fabian Rabensteiner e l’Austriac Daniel Geismayr che vevan gudagnà fin uss tut las etappas e che restan uschia er vinavant a la testa dal classament general. Andrin Beeli ha pers strusch ina minuta sin ils victurs, Fadri Barandun bun duas minutas.
En il classament general restan Fadri Barandun e Vinzent Dorn sin il 6avel plaz cun in retard da strusch mes’ura. Andrin Beeli e Frans Claes pon far in sigl enavant sin il 7avel plaz cun in retard da radund 43 minutas. L’Engiadinais ed il Sursilvan èn er ils megliers e sulets svizzers classads sut ils top 10.
Puspè las Tudestgas Janas e Morath
Tar las dunnas han er gudagnà la quarta etappa las Tudestgas Bettina Janas ed Adelheid Morath, quella giada dentant be piz a cup en in sprint final encunter la Svizra Janina Wüst che parta ensemen cun la Taliana Debora Piana. La Grischuna Alessia Nay ha ensemen cun sia collega Antonia Bünter cuntanschì l'arrivada a Tavau sco quart cun in retard da 34 minutas.
En il classament general da las dunnas meina il duo tudestg cun Janas e Morath vinavant cun in avantatg da 13:37 minutas sin Janina Wüst e Deobra Piana. Alessia Nay da Zezras sa chatta sin il quart plaz cun in retard da bunamain duas uras.
La 5avla ed etappa finala da la sonda ha lieu en la regiun da Tavau, in'etappa da 58 kilometers cun 1850 meters differenza d'autezza.
3. etappa: Laax – Laax (63 km / 2200 m)
Suenter plirs defects en las emprimas duas etappas èsi finalmain reussì ad Andrin Beeli da Sagogn da terminar in'etappa dal Swiss Epic sin il podest. Ensemen cun ses collega Frans Claes da la Belgia è Beeli vegnì terz en l'etappa da Laax, in'etappa ch'ha manà sin ses trails da chasa. Quest duo ha la finala pers be 1:30 minutas sin ils victurs, il Talian Fabian Rabensteiner e l'Austriac Daniel Geismayr. Per ils dus favurits èsi gia la terza victoria en seria.
Fadri Barandun da Samedan ha ensemen cun il Tudest Vinzent Dorn terminà l'etappa a Laax sin il 7avel plaz cun in retard da 6:19 minutas.
Tar las dunnas n'èn las Tudestgas Bettina Janas ed Adelheid Morath betg da franar. Quest duo ha er gudagnà la terza etappa ed uschia er augmentar l'avantatg en il classament general. La Grischuna Alessia Nay ha ensemen cun sia collega Antonia Bünter terminà l'etappa sin il quart plaz.
En il classament general dals umens resta, suenter trais da tschintg etappas, il duo talian-austriac cun Rabensteiner e Geismayr a la testa, quai cun in avantatg da 6:21 minutas sin ils Tudestgs Martin Frey e Simon Stiebjahn. Fadri Barandun e ses collega Vinzent Dorn han pers ina posiziun e sa chattan da nov sin il 6avel plaz. Fatg in sigl sut ils top 10 han Andrin Beeli e Frans Claes. Cun in retard da bun 42 minutas èn els sin posiziun 10.
Il venderdi spetga l'etappa roiala che maina da Laax a Tavau, quai sur 100 kilometers cun 2800 meters differenza d'autezza.
2. etappa: Arosa – Laax (79 km / 2600 m)
Il team ch’ha gudagnà l’emprima etappa ha era persvadì a la segunda etappa. Wilier Pirelli Factori cun il Talian Fabian Rabensteiner e L'Austriac Daniel Geissmayr han er gudagnà cleramain la segunda etappa sur 79 kilometers d'Arosa a Laax.
Fadri Barandun da Samedan finescha l'etappa sco tschintgavel ensemen cun ses collega tudestg Vinzent Dorn. Gia en l'emprima etappa era quest duo vegnì 5avel. Sin questa plazza sa chatta Fadri Barandun actualmain er en il classament general ed è uschia il meglier svizzer classà.
Andrin Beeli da Sagogn ha danovamain gì discletg ed uschia puspè manchentà in plaz sut ils top 10. Suenter in defect avant Domat èn Beeli e ses collega da team Frans Claes da la Belgia arrivads a Laax sco 13avels. Avant il defect tecnic sa chattava quest duo sin il terz plaz cun in retard da be bun ina minuta sin la gruppa da testa.
Era tar las dunnas pon las victuras da l’emprima etappa defender lur posiziun. Las Tudestgas Bettina Janas ed Adelheid Morath dal team Tavau-Claustra han dominà l'etappa d'Arosa a Laax.
Cun Alessia Nay ha era ina dunna grischuna persvadì. La mountainbikera da Zezras che parta ensemen cun Antonia Bünter ha cuntanschì l’arrivada a Laax sco quarta.
Ils mountainbikers conquistan ils trails ad Arosa, Laax e Tavau
La seria da «Swiss Epic» fa questa stad danovamain fermada en il Grischun. Las tschintg etappas mainan dad Arosa sur Laax a Tavau. RTR mussa tut las cursas da mountainbike en in livestream.
En tut han ils cracks da mountainbike da dumagnar ina ruta da 359 kilometers – cun 11'700 meters a munt e 11'850 meters a val. L'entira cursa è repartida en tschintg etappas.
- Mardi, ils 16 d'avust: Arosa – Arosa
- Mesemna, ils 17 d'avust: Arosa – Laax
- Gievgia, ils 18 d'avust: Laax – Laax
- Venderdi, ils 19 d'avust: Laax – Tavau
- Sonda, ils 20 d'avust: Tavau – Tavau
Persequitai tut las etappas en in livestream sin rtr.ch, PlayRTR ubain sin facebook.
Partenza ed arrivada da l'emprima etappa è ad Arosa, tranter auter stat il trail dal Hörnli sin il program. Il segund di sa metta il tross en direcziun Laax e sto surmuntar il pli aut punct – il Urdenfürggli sin 2'546 meters sur mar. Il terz di spetga in'etappa sin differents trutgs da mountainbike a Laax, p.ex. il Runca Trail. Il quart di spetga ils mountainbikers l'etappa roiala – la pli lunga etappa cun 100 km da Laax a Tavau. L'etappa finala è lura pli curta sin ils trails en la regiun da Tavau.
| Etappas en detagl | Distanza | Autezza | |
| 1. | Arosa – Arosa (differents trails, tranter auter Janetsch Boden, Hörnli). Partenza a las 07:40. |
59km |
2'250m |
| 2. | Arosa, Urdenfürggli, Valbella, Parpan, Malix, Passugg, Cuira, Domat, Rehanau, Trin, Laax. Partenza a las 07:10. | 79km |
2'600m ensi 3'150m engiu |
| 3. | Laax, Falera, Ruschein, Glion, Schluein, Sagogn, Laax, Flem, Fidaz, Startgels, Runcahöhe, Flem, Laax. Partenza a las 07:40. | 63km |
2'200m ensi 2'200m engiu |
| 4. | Laax, Flem, Tumein, Rehanau, Raén, Giuvaulta, Farschnò, Vaz, Alvaschagn, Casti, Surava, Alvagni, Filisur, Tavau. Partenza a las 06:40. | 100km |
2'800m ensi 2'400m engiu |
| 5. | Tavau – Tavau (differents trails, tranter auter Panorama, Gotschna, Drusatscha). Partenza a las 09:00. | 58km | 1'850m |
Grond interess internaziunal
A la partenza èn duos da l'entir mund – da profis fin a sportists da hobi. Ina fatscha enconuschenta dal Grischun è Andrin Beeli da Sagogn che parta ensemen cun Frans Claes da la Belgia. A la partenza è er Fadri Barandun da Samedan che sa participescha ensemen cun il tudestg Vinzent Dorn. Ulteriurs participants grischuns èn tranter auter l'anteriur passlungist Livio Bieler da Panaduz, il president da la cursa da passlung Planoiras da Lantsch, l'anteriura triatleta e multi-sportista Nina Brenn da Flem u la ciclista Alessia Nay da Zezras.
Senza Nino Schurter
Er ils dus svizzers ch'han gudagnà l'onn passà il Swiss Epic èn puspè da la partida – dentant cun novs partenaris: Nicola Rohrbach parta en in duo svizzer cun Nils Landenberger e la victura da las dunnas Ariane Lüthi cun Faranak Partoazar da l'Iran.
Betg a la partenza èn percunter Nino Schurter ch'ha triumfà il 2020 ensemen cun Lars Forster ed ils dus frars Mathias e Lukas Flückiger ch'han er gia gudagnà diversas giadas questa cursa da mountainbike extrema. Sin Nino Schurter e Mathias Flückiger spetga la dumengia, ils 28 d'avust, la cursa dal campiunadi mundial da mountainbike a Les Gets en Frantscha. Vital Albin è actualmain al campiunadi europeic da mountainbike a Minca.
Ils organisaturs hajan empruvà da crear ina cursa attractiva per tut las participantas ed ils participants, hai num en ina communicaziun.
La ruta garantescha ina cursa animada tranter ils teams d'elita – dentant er ils sportists da hobi vegnan sin lur custs.
En tut sa participeschan 425 teams da duas persunas a la cursa da mountainbike internaziunala – la finala vai per sa qualifitgar per il Cape Epic en l'Africa dal Sid.
Dal 2014 fin il 2018 ha il Swiss Epic manà tschintg giadas tras il Vallais. Dal 2019 fin il 2023 ha questa cursa lieu en il Grischun, quest onn pia gia per la quarta giada.