Sco emprima equipa da hockey engiadinaisa en segunda liga as ha il EHC San Murezzan qualifitgà per ils playoffs. L’equipa da l’Engiadin'Ota ha cuntanschì questa finamira gia trais partidas avant la fin da la qualificaziun.
L’equipa po pia gia uss sa preparar sin la fasa decisiva dal campiunadi. E durant las davosas duas partidas da qualificaziun anc filar in zichel vi da la furma.
Ils playoffs cumenzan gia uss.
La probabilitad ch'il EHC San Murezzan po terminar la qualificaziun sin ina da las emprimas quatter plazzas è gronda. Uschia pudess l’equipa da l’Engiadin'Ota profitar en ils playoffs da l’avantatg da chasa. In avantatg ch’è betg da sutvalitar. L’avantatg da chasa po esser decisiv sin la via da success.
Cler è gia ussa ch'il EHC San Murezzan vul questa giada far meglier che las ultimas trais stagiuns, nua che l’equipa era adina gia crudada ora da la decisiun en l’emprima runda da playoff.
Cun nov trenader tras auts e bass
Il EHC San Murezzan ha cumenzà la nova stagiun cun in nov trenader. A l’entschatta dal campiunadi han l’equipa ed il nov trenader l’emprim stuì vegnir ad enconuscher. Quai era alura era la fasa nua ch'il EHC era il pli flaivel.
Suenter ina emprima fasa da sconfittas è l’equipa vegnida adina meglier en furma. Cun la qualificaziun per ils playoffs ha l’equipa cuntanschì l’emprima finamira. La squadra vul uss dentant anc dapli.
