Bunamain 50 participants èn currids en differentas gruppas da fermezza da Razén fin a Glion, quai sur la distanza da 24 kilometers. Il rest è partì a la staziun da Versomi fin a Glion, ina distanza da 11,5 kilometers. Las differentas gruppas en mintgamai vegnidas manadas d’in guid local.
Per ina giada n’è betg la prestaziun sportiva stada en il center, mabain il currer communablamain tras ina da las pli spectacularas chavorgias da la Svizra. I n’è betg vegnì mesirà il temp ed uschia n’hai er betg dà ina rangaziun a Glion.
Bizochels e petta
Sco usità a las cursas Transviamala e Transruinaulta hai dà per mintgin ina purziun bizochels en l’arrivada. Silsuenter spetgava anc il legendar buffet da pettas.
Transviamala e Transruinaulta 2020
Pervia dal Coronavirus han curridras e curriders er stuì resguardar diversas prescripziuns. Tranter auter è vegnì dà gronda paisa che mintgin tegnia en la distanza in da l’auter. Plinavant han mintgamai be quatter persunas dastgà seser ensemen vid ina maisa tar il gentar a Glion. Ils gidanters e voluntaris han tuts purtà ina mascra.
Seria da cursas
Ils 12 da settember spetga il proxim event. Lura vegn currì da Tusaun tras la Viamala fin a Donat, quai en la medema furma, pia en differentas gruppas senza mesirar il temp e senza rangaziun. L’october vegn anc ina giada currì tras las duas chavorgias da la Ruinaulta e da la Viamala, quai da glina plaina.
