Betg la grondezza da las cursas è l’impurtant mabain la qualitad.
Ord motivs da corona han ils organisaturs decidì gia baud da limitar il dumber da curridras e curriders sin mintgamai 500. Ma er cun quest dumber reducì saja stà ina fitg buna fin d’emna manegia Thomas Häusermann, il president dal comité d’organisaziun. I sajan stadas cursas pli modestas e famigliaras. Ma els sajan cuntents ch’i haja puspè dà cursas en la furma usitada suenter ch’il Transviamala ed il Transruinaulta eran stads il 2020 unfrendas da la pandemia da corona.
Ina chanzun sin giubileum da 20 onns Transviamala
La cursa Transviamala ha festivà quest onn il giubileum da 20 onns. Cumenzà ha tut dentant gia pli baud. Il 1980 èn vegnidas organisadas las emprimas cursas da currer en la Val Schons, il Schamserlauf. Restà legendar sur tut quels onns è il buffet da pettas e la part culinarica che tutga tiers al Transviamala. Per l’entira regiun è quest di da cursa er in di da festa.
Sin l’ediziun da giubileum 20 onns Transviamala è er vegnì cumponì ina chanzun che raquinta l’istorgia da quella cursa. Melodia e text vegnan da Nadia Ambühl, scolasta a Donat e commembra dal comité d’organisaziun. La chanzun chantada dals uffants da la scola da Donat ha gì sia premiera a la partenza dal Transruinaulta a Glion.
