Siglir tar il cuntegn

Header

Transviamala
Legenda: Pervia da la pandemia da corona han ils organisaturs limità il Transviamala 2021 sin 500 curridras e curriders. mad
cuntegn

Val Schons Victorias internaziunalas al Transviamala

Il Tudestg Stefan Hubert e l’Austriaca Sabine Reiner gudognan la 20avla ediziun dal Transviamala 2021, la cursa da currer sur 19 kilometers da Tusaun fin a Donat en la Val Schons. Ils dus victurs èn dapi questa stad maridas e geniturs da dus uffants.

Stefan Hubert ha triumfà en in temp da 1:19.56 uras ed è uschia stà bunamain quatter minutas pli spert che Urs Jenzer da Frutigen che veva gudagnà la sonda il maraton da trail Transruinaulta da Glion a Tusaun. Cumplettà il podest sco terz ha l’indigen Gian-Luca Michael da Ziràn.

audio
Transviamala: Tuns e suns da victuras e victurs
aus Sport ed actualitad vom 24.10.2021.
abspielen. Laufzeit 3 minutas 35 Sekunden.

Sabine Reiner ch’è sco ses um Stefan Hubert sa participada per l’emprima giada al Transviamala ha triumfà en in temp da 1:32.37 uras. La spezialista da cursas da distanza e cursas da muntogna è uschia stada bunamain 10 minutas pli sperta che Tamara Rimann da Son Gagl. Terza è vegnida Elisa Marini da Tavau Clavadel.

La cursa curta dal Transviamala sur 11,5 kilometers ha gudagnà tar il umens il mattadur local Sandro Michael da Ziràn e tar las dunnas Carla Wohler ch’ha battì en in sprint final sia sora schumellina Gianna Wohler. Las duas Grischunas abiteschan dapi intgins onns cun la famiglia a Spiez en il chantun Berna.

Katja Zwiker, Urs Jenzer, Nuno Arioli e Lisa Knechtle
Legenda: da san. Katja Zwiker (regina), Urs Jenzer (retg), Nuno Arioli (prinzi) e Lisa Knechtle (princessa) mad

Urs Jenzer e Katja Zwiker van cun la curuna

Il nov retg da las chavorgias sa numna Urs Jenzer. Il currider da Spiez da 51 onns ha gudagnà la cumbinaziun dal Transruinaulta e Transviamala, quai a moda suverana. Jenzer è stà per l’emprima giada a la partenza a las cursas da Glion a Tusaun respectiv da Tusaun a Donat. Tar las dunnas daventa Katja Zwiker la nova regina da las chavorgias. Ella era vegnida segunda en la cursa Transruinaulta sur 42 kilometers e terminà la cursa Transviamala sco 5avla.

RTR actualitad 17:00

Artitgels legids il pli savens

Scrollar a sanestra Scrollar a dretga