Trun - Team Cadi trenescha cun Fabrizio Cavegn

Daventar in di profi da ballape, quai è il siemi da blers uffants e giuvenils. In dals paucs ch’ha dumagnà quai en il Grischun è Fabrizio Cavegn da Vella. L’attatgader da 22 onns ha lantschà sia carriera sco junior tar il FC Son Gagl e dapi dus onns è il Lumnezian il capo-tiragols dal FC Vaduz en la Challenge League, la segunda meglra liga da ballape en Svizra.

Dacurt è Cavegn vegnì onurà sco meglier giugader da l’onn 2024 en la Svizra Orientala. Sia bunas prestaziuns tar il Club dal Principadi da Liechtenstein sveglian uss era l’interess vi dal Sursilvan. Uschia han ils clubs da la Super League en egl Fabrizio Cavegn ch’ha dentant anc in contract tar il FC Vaduz fin il 2026.

Il glindesdi saira n’è Fabrizio Cavegn però betg ì a la chatscha da gols e puncts, mabain ha fatg ina visita a Trun ed ha trenà a Pustget durant bun in’ura e mesa cun ils juniors F dal Team Cadi che vegnan trenads da Thomas Bearth e ses collegas Damian Allenspach e Stefano Stagliano.

Uschia han 24 giuvenils tranter 7 ed 8 onns pudì trenar cun l’actual meglier giugader grischun. Fabrizio Cavegn ha dà tips e trics, autograms e sa chapescha n’ha er ina fotografia cun l’entira equipa betg dastgà mancar. In di tut spezial, tant per ils giuvens ballapedists da la Cadi sco era per il profi Lumnezian.

Impressiun dal trenament cun Fabrizio Cavegn