Er sche la concurrenta per la culla gronda da cristal Federica Brignone è stada svelta, hai tanschì per Lara Gut-Behrami. Ella è vegnida 10avla en il slalom gigant a Saalbach. Uschia ha ella gudagnà uschèbain la culla pitschna da la disciplina sco er la culla gronda da cristal per la meglra skiunza da quest enviern.
Per dumagnar quai ha Gut-Behrami almain stuì vegnir 14avla. Suenter l'emprim percurs è ella stada sin l'otgavel plaz. Suenter il segund percurs ha ella gì 3,2 secundas retard sin Federica Brignone (ITA). Quella ha gudagnà la cursa, n'ha dentant betg pudì far la differenza sin la Tessinaisa per gudagnar il classament general da la cuppa mundiala.
Las Svizras Michelle Gisin e Camille Rast èn vegnidas 14avlas e 15avlas cun passa 3,5 secundas retard sin Federica Brignone.
Anc pussaivel da far duas ulteriuras cullas
La proxima fin d'emna spetgan anc ina cursa rapida ed in super-G. Er en questas cursas ha Gut-Behrami anc schanzas per duas ulteriuras cullas. Recaltgar en tut quatter cullas en ina stagiun han enfin uss be trais autras skiunzas dumagnà en l'istorgia.
