Edy, in omagi al campiun olimpic Romedi Rainalter da San Murezzan, duess restar en il lieu da sia tgina. Tenor la suprastanza communala da San Murezzan na pon ins betg permetter ch’in tal object simbolic per il grond eveniment bandunass l’Engiadina. Quai ha ditg il president communal da San Murezzan, Sigi Asprion, ad RTR.
Pliras pussaivladads per Edy
Nua ch’il skiunz, che ha in’autezza da 19 meters, duai finalmain vegnir posiziunà a San Murezzan, na saja dentant betg anc enconuschent: I dettia pliras variantas. Era davart la dumonda da pretsch na sajan ins anc betg uschè enavant, ha agiunt Asprion.
Cler saja, che Edy resta uss segir fin la primavaira en ses lieu origin en il Kulm-Parc, nua che tut las ceremonias da medaglias han gì lieu. Entant vul la vischnanca da San Murezzan contactar il possessur actual dad Edy, la societad dals Campiunadis mundials da skis 2017, e tractar davart il «pretsch».
-
Bild 1 von 4. Il skiunz Edy curt avant l'avertura dals Campiunadis mundials da skis 2017. Bildquelle: RTR, Anna Caprez.
-
Bild 2 von 4. Imposant cun sia autezza da 19 meters ed in pais da bun 8 tonnas. Bildquelle: RTR, Anna Caprez.
-
Bild 3 von 4. Durant la ceremonia d'avertura è Edy era stà in lieu per inscenaziuns da glisch. Bildquelle: RTr, Anna Caprez.
-
Bild 4 von 4. Edy è svelt daventà ina figura da simbol per ils Campiunadis mundials da skis 2017. Bildquelle: RTR, Anna Caprez.