Dapi divers onns è la golia engiadinaisa Seraina Friedli ina constanta en la meglra liga da ballape da las dunnas en Svizra, en la Woman’s Super League. Blers onns ha ella dà il campiunadi cun diversas squadras. Cun l’equipa da las dunnas dal FCZ ha Seraina Friedli tranter auter gudagnà sis giadas il titel da campiunessa svizra. En la vegliadetgna da trenta onns vul la golia anc ina giada far il proxim pass. Perquai ha la sportista da La Punt suttascrit in contract per in onn cun il RSC Anderlecht, il campiun actual en la Belgia.
Chalar, ni cuntinuar cun la carriera tar ina equipa professiunala
Cun il titel en il satgados dal FCZ tar Anderlecht
Durant las davosas emnas dal campiunadi en Svizra s'è Seraina Friedli fatg la dumonda: duess jau chalar cun mia carriera, u dar anc ina giada in nov impuls ed empruvar da cuntinuar la carriera per la segunda giada a l’ester. Gia la stagiun 2020/2021 ha Seraina Friedli dà en la meglra liga da ballape da las dunnas da l’Italia tar Florentia San Gimignano. Pervi da problems finanzials s'è l’equipa stuì retrair dal campiunadi. Uschia che la ballapedista è turnada en Svizra.
Puspè vita da profi
Sco tar Florientia San Gimignano spetga Seraina Friedli er tar il RSC Anderlecht puspè la vita sco professiunala da ballape. Tut las giugadras en la meglra liga da ballape da las dunnas en Belgia pon viver dal sport. E precis quai er tar la decisiun da far anc ina giada il pass a l’ester decisiv per Seraina Friedli. Mo en in conturn professiunal possia ella far il proxim pass.
Or da l'archiv
