Suenter passa trais decennis sto il record svizzer dal decatlon ceder. Simon Ehammer surpassa quel tar in meeting en Germania. Per passa 100 puncts, ha l'atlet appenzellais da 22 onns augmentà il record d'enfin uss, sin la nova marca da 8'354 puncts. Il vegl record aveva Beat Gähwiler, che ha ditg vivì a Landquart, fatg l'onn 1988 a Götzis.
8,30 meters
Simon Ehammer n'ha betg mo fatg in nov record svizzer en il decatlon cun puncts, el ha era fatg in nov record svizzer dal sigl en lung. El è siglì 8,30 meters, 3 centimeters pli lunsch ch'avant 19 onns Julien Fivaz. Uschè lunsch sco Simon Ehammer n'è anc mai in sportist siglì, durant ina concurrenza da decatlon.
