Il podest:
- Marius Lindvik (NOR)
- Ryoyu Kobayashi (JPN)
- Karl Geiger (GER)
Ils Svizzers manchentan da sa classar tar la victoria da Marius Lindvik tranter ils top 20. Ils blers sigls èn stads fitg buns, ils resultats dentant dischillusiunant.
Ils Svizzers:
- 22. Gregor Deschwanden
- 25. Simon Ammann
- 27. Killian Peier
- 36. Dominik Peter
Simon Ammann ha mussà dus buns sigls sin 131,5 e 132,5 meters. Bler megler na po el il mument strusch siglir. La concurrenza è dentant fitg ferma. Perquai è resultà per l'um da 40 onn a ses 7avels gieus olimpics be il 25avel plaz. El avess gia avant Peking stuì mussar talas prestaziuns per pudair metter anc in sisur durant ils gieus olimpics.
Killian Peier sto magunar in'ulteriura trumpada. Il terz dal campiunadi mundial 2019, è vegnì sin plaz 27 (130m/129m). Dominik Peter ha stuì guardar tiers en la runda finala.
Meglier Svizzer è stà Deschwanden, sco gia sin la schanza normala. Ma cun 132 e 132,5 meters, n'hai betg tanschì per ils top 20. Il Lucernais ha gì ils medems sentiments sco Simon Ammann, malgrà ch'el è siglì fitg bain, è el sa classà entamez.
Lindvik cun cundiziuns perfetgas
Il Norvegiais, Marius Lindvik ha pudì siglir cun cundiziuns quasi sco en il labor. Lindvik è siglì 140,5 e 140 meters ed ha uschia er anc pudì surpassar il Giapunais Ryoyu Kobayashi. Bronz ha fatg il Tudestg Karl Geiger.
L'emprima giada dapi il 1964 va la medaglia olimpica d'aur puspè en Norvegia. Plinavant ha Lindvik uschia evità che Kobayashi ha pudì daventar in ulteriur campiun dubel d'olimpia. Quai dasper Matti Nykönen (1988), Simon Ammann (2002 e 2010) sco er Kamil Stoch (2014).
