Simracing è la versiun digitala dal sport motorisà real. In mund, nua ch'ils cunfins tranter realitad e simulaziun sa perdan. Davent da chasa cumbattan automobilists da l’entir mund digital in cunter l’auter. Gian Luca Palmisano da S-chanf è fascinà da las cursas virtualas, nua ch’el po viver sia passiun da dar gas, la precisiun da las curvas e la canera da motors. Simracing è per il giuven da 26 onns però dapli ch'in gieu.
Igl è ina simulaziun d’in auto da cursa real, in ad in.
Investir per realisar il siemi
Tar il Simracing datti differentas ligas e cursas da diversas categorias d’auto. A chasa a S-chanf absolva Gian Luca Palmisano en emprima lingia cursas da 12 u 24 uras, ensemen cun sia squadra tudestga. Il grond siemi da l’Engiadinais è da pudair seser in di en in auto da cursa real da la furmla 4.
Perquai fa el sper il trenament a chasa er regularmain il viadi a Turitg en ina uschenumnada lounge. Là cumbatta el actualmain en la segunda liga virtuala da la furmla 1. Quels cockpits èn anc pli datiers a la realitad, las forzas da gravidanza senta el anc pli fitg. I saja d'investir tut, ma sch’el saja bun da gudagnar cursas, lura saja bain pussaivel ch’el haja in di la fortuna da pudair far rundas er cun in auto real.
