Suenter numerus success e divers onns en il sport da lutga ha il meglier lutgader grischun dals ultims onns, Armon Orlik, dà nov schlantsch a sia carriera. El ha fatg midada da Maiavilla a Rapperswil e trenescha dapi questa stagiun cun ils lutgaders songagliais. Sper ils trenaments cun la societad da lutga da Rapperswil trenescha il lutgader da 28 onns era cun ils ferms lutgaders dal Toggenburg. Uschia ha Armon Orlik vulì augmentar anc ina giada il nivel da trenament. Questa midada para propi da purtar fritgs.
La furma constat, jau crai che jau poss vegnir anc pli ferm.
Gudagnà trais festas da lutga durant questa stagiun
Quasi davent da l’entschatta da questa stagiun ha Armon Orlik pudì mussar bunas lutgas. In emprim punct culminant da la stagiun era lura segir ch'el ha pudì gudagnar la festa da la federaziun da la Svizra dal nordost NOS. Per l’emprima giada dapi quatter onns ha il lutgader grischun puspè pudì gudagnar uschè ina gronda ed impurtanta lutga. La victoria tar il NOS a Mollis è segir stà in emprim segn d’exclamaziun dal lutgader ch'ha sco menziunà midà sia moda da trenament.
Punct culminant: Festa da lutga dad Unspunnen
La festa da lutga dad Unspunnen ad Interlaken datti be mintga sis onns. Perquai ha la festa en Surselva Bernaisa il caracter d'ina festa federala. Ils megliers 120 lutgaders svizzers èn da la partida tar il punct culminant da la stagiun. Da quels era trenta lutgaders da la federaziun NOS, e da quels èn dus grischuns. Christian Biäsch da Tavau ed Armon Orlik da Maiavilla.
