Beat Feuz sto dar forfait a Bormio pervi dad ina grippa. Quai ha il spezialist da cursa rapida communitgà oz avant il segund trenament. A Bormio ha Feuz cuntanschì en sia carriera trais plazzas da podest. La turnea da cumià da Feuz cumpiglia damai be anc las cursas a Wengen e las duas sin la «Streif» a Kitzbühel.
Cumià dal sport professiunal
Ils 21 da december ha Beat Feuz annunzià, che la cursa rapida a Kitzbühl ils 21 da schaner 2023 vegn ad esser sia ultima cursa. Ses sentiment saja stà sur onns la clav per ses success, ussa haja el il sentiment ch'el saja vegnì a ses cunfins corporals, citescha Swiss ski a Feuz.
L'expert da cursa rapida ha tranter auter gudagnà quatter giadas la culla da cristal per la cursa rapida, è stà campiun mundial ed olimpic ed è stà 58 giadas sin il podest da la cuppa mundiala.
Jau ma legrel da pudair giudair mias duas cursas preferidas a Wengen e Kitzbühl anc ina giada.
Feuz saja engraziaivel d'avair pudì pratitgar sia passiun per uschè ditg e s'allegra ussa sin avair dapli temp per sia famiglia, scriva Swiss Ski vinavant.
