Il skiatlon dals umens sur 30 kilometers (15 km classic e 15 km skating) è stà ina cursa tranter Alexander Bolschunow ed ils Norvegiais. La finala ha il grond favurit Russ pudì sa distanziar da ses gronds rivals. Bolschunow gudogna la cursa avant ils dus Norvegiais Simen Hegstad Krüger e Hans Christer Holund. Sin ils plazs quatter fin sis suondan trais ulteriurs Norvegiais cun Johannes Kläbo, Emil Iversen ed il defensur dal titel Sjur Röthe.
Per Alexander Bolschunow èsi l'emprim titel a campiunadis mundials. Fin oz era il Russ vegnì quatter giadas segund. Er a gieus olimpics hai dà fin oz trais giadas argient.
Dario Cologna manchenta in exploit
Il grond trumf svizzer ha mussà ina cursa solida. Suenter ils emprims 15 kilometers classic era Dario Cologna anc sin ils chaltgogns als curriders a la testa. Suenter midar sin ils skis da skating è il Jauer dentant crudà en ina rusna ed ha pers bler temp. Encunter la fin è Cologna dentant puspè sa revegnì uschia ch'i ha la finala anc tanschì per il 10avel plaz, quai cun in retard da 2 minutas sin Alexander Bolschunow.
La proxima schanza vegn lura mesemna proxima. Lura spetga la cursa singula da 15 kilometers en il stil liber. En questa disciplina è Dario Cologna vegnì trais giadas campiun olimpic.
3 Grischuns tranter ils top 20
Ina buna prestaziun ha principalmain er Jason Rüesch mussà. Il passlunghist da Tavau ha pers be quatter secundas sin Dario Cologna ed è vegnì 15avel. Jonas Baumann da Lon che aveva la finamira da cuntanscher in plaz tranter ils megliers 15 e la finala vegnì 20avel cun in retard da 3:31 minutas. Il quart Svizzer, Candide Pralong, ha terminà la cursa sco 30avel cun in retard da passa quatter minutas.
Therese Johaug ina classa per sa sezza
Tar las dunnas ha triumfà la gronda favurita Therese Johaug. La Norvegiaisa ha gudagnà il skiatlon da 15 kilometers cun in avantatg d'ina mesa minuta avant las duas svedaisas Frida Karlsson che gudogna argient ed Ebba Andersson che gudogna bronz. Per Johaug èsi gia il 11avel titel da campiunessa mundiala.
Svizras n'èn naginas stadas a la partenza a questa emprima cursa da distanza. Nadine Fähndrich e Laurien van der Graaff han uschia spargnà las forzas per il sprint d'equipa da la dumengia (28-2). En questa cursa vul il duo svizzer gudagnar ina medaglia suenter esser stà quatter giadas sin il podest en ils davos quatter sprints d'equipa da la cuppa mundiala.
