Il meglier skiunz grischun dals davos onns è stà Carlo Janka da Sursaissa. Janka ha gudagnà tut quai ch'i dat da gudagnar en il circus da skis. El è vegnì campiun olimpic, campiun mundial, e Carlo Janka ha er gudagnà la cuppa mundiala generala sco skiunz il pli cumpetitiv da l’entira stagiun. Sco blers auters, era er Carlo Janka en ses giuvens onns part da la federaziun grischuna da skis BSV. Or da quella è vegnì inqual skiunz che ha gudagnà medaglias olimpicas, u tar campiunadis mundials. Martin Hangl, Ambrosi Hoffmann u Marc Berthod per numnar be in per.
Skiunzas grischunas sin il podest èn stgarsas
Anc mai n'ha quai dà ina campiunessa mundiala grischuna en la disciplina roiala, en la cursa rapida. Jasmine Flury è l’emprima skiunza grischuna cun quest titel. Ed ella è era l’emprima skiunza grischuna che gudogna ina medaglia tar ina concurrenza gronda dapi varga 60 onns. L’onn 1960 aveva Yvonne Rüegg gudagnà aur tar ils gieus olimpics a Squaw Valley en il slalom gigant.
Valur economica per federaziun grischuna da skis BSV
La valur da quest titel è enorm. Surtut per il sport da massa. Quai han ins vis tar la festa da bainvegni da la nova campiunessa mundiala tar ella a chasa a Tavau Monstein. Tschients creschids ed uffants èn stads da la partida. Bain pussaivel ch'il titel exclusiv da Jasmine Flury ha in effect positiv sin giuvnas skiunzas e giuvens skiunzs. E bain pussaivel che la medaglia dad aur da la skiunza grischuna motivescha in u l’auter da far quest sport e da star vidlonder era sch'igl è fitg, fitg difficil.
