La cursa da notg a Schladming è puspè stada in spectacul malgrà plievgia. Mussà en omaduas cursas la megliera prestaziun ha il Tudestg Linus Strasser ed uschia gudagnà per sin la pista Planai quai be inquals dis suenter ses triumf en il slalom da Kitzbühl. Sin segunda plazza è vegnì Timon Haugan da la Norvegia (+0.28). Cun dapli distanza sin plazza trais è classà il Franzos Clement Noël (+1.02). Manchentà per per il nair da l'ungla cun 6 tschientavels il podest ha il Svizzer Marc Rochat. En ils ultims slaloms ha el mussà prestaziuns constantas ed adina fatg puncts. Las ultimas giadas è el s'avischinà adina pli fitg al podest.
Ils Svizzers
- 4. Marc Rochat
- 8. Daniel Yule
- 15. Luca Aerni
- 16. Loïc Meillard
Sper Marc Rochat ha er Daniel Yule mussà ina buna prestaziun cun plazza 8. Ordaifer ils top 10 èn sa rangads Luca Aerni e Loïc Meillard. Dumagnà la qualificaziun per il segund percurs ha Reto Schmidiger che cumbatta a la fin da la glista da start per insumma partir en la cuppa mundiala. Gia a fin en l'emprim percurs è la cursa stada per Ramon Zenhäusern ch'è er crudà or. Il Vallesan cumbatta cun problems dal dies, a Kitzbühl aveva el anc desistì da far part.
