Puspè ina giada a moda suverana gudogna l'Americana Mikaela Shiffrin il slalom ad Are en la Svezia. Ella tegn l'avantatg ord l'emprim percurs sin Wendy Holdener – ed è la finala bunamain ina secunda pli sperta che la Svizra. Era sin il podest vegn la Svedaisa Anna Swenn-Larsson sco terza.
- 1. Mikaela Shiffrin 1:41.77 minutas
- 2. Wendy Holdener +0.92 secundas
- 3. Anna Swenn-Larsson +0.95
Per Mikaela Shiffrin èsi la 87avla victoria da la cuppa mundiala. E cunquai è l'Americana la sportista cun las pli bleras victorias – ella surpassa il record d'enfin uss tegnì dal skiunz svedais Ingemar Stenmark.
Segund meglra Svizra daventa ad Are Mélanie Meillard – il plaz 7 munta ses meglier resultat en la cuppa mundiala dapi passa tschintg onns. Nicole Good egualisescha cun plaz 12 ses meglier resultat da la cuppa mundiala. Ed era tut las ulteriuras Svizras partidas han fatg puncts.
Ils rangs da las Svizras:
- 7. Mélanie Meillard +2.18 secundas
- 12. Nicole Good +2.72
- 15. Elena Stoffel +2.98
- 18. Michelle Gisin +3.06
- 24. Camille Rast +3.99
