Livio Simonett è en furma. Mo in di suenter si'emprima victoria en ina cursa da la cuppa d'Europa ha il skiunz da Casti er gudagnà il segund slalom gigant a Zinal. El è stà 12 tschientavels avant Josua Mettler da Toggenburg.
En l'emprima cursa è il skiunz grischun da 24 onns stà 0,9 secundas pli spert ch'il Talian Alex Vinatzer. Igl è il segund plaz da podest per Simonet en la cuppa europeica – il favrer passà ha el cuntanschì il segund plaz en in slalom gigant ad Oppdal en Norvegia.
Sonda passada aveva Simonet er recaltgà puncts da la cuppa mundiala. A Val d'Isère er'el vegnì 19avel en il slalom gigant.
11 skiunz da Swiss-Ski van a Gröden
Il specialist da slalom gigant n'è betg da la partida a las cursas da la cuppa mundiala a Gröden, che cumenzan la gievgia. Là han be lieu duas cursas rapidas ed in Super-G. Swiss-Ski prenda cun 11 atlets – quai èn:
- Gino Caviezel
- Yannick Chabloz
- Beat Feuz
- Niels Hintermann
- Urs Kryenbühl
- Alexis Monney
- Justin Murisier
- Marco Odermatt
- Stefan Rogentin
- Lars Rösti
- Gilles Roulin
Tge skiunz che prendan part a tge cursa, vegn pir decidì a curta vista avant lieu.