Tar las cursas da la cuppa mundiala da snowboard a Scuol ha l'equipa svizra trumpà. Julie Zogg e Ladina Jenny èn crudadas ora en l'otgavel finals dal slalom parallel. Ils umens n'han insumma betg dumagnà la qualificaziun. Gian Casanova è vegnì 20avel e Dario Caviezel è crudà ora.
Tar las dunnas ha la finala gudagnà Lucia Dalmasso da l'Italia, avant sia cumpatriota Jasmin Corrati e la Giapunaisa Tsubaki Miki. En il classament general è Julie Zogg sin plazza 6 e Ladina Jenny sin plazza 10. A la testa è Ramona Hofmeister da la Germania.
Era duas indigenas èn stadas da la partida
Manchentà per pauc la fasa da k.o. han las duas indigenas Larissa Gasser da Madulain e Ricarda Hauser da Scuol. Gasser è vegnida 17aval e Ricarda Hauser 21avla. Per Hauser era quai gist il meglier resultat da la carriera.
Umens svizzers senza schanzas
Tar ils umens ha l'Austriac Benjamin Karl gudagnà avant il Sloven Tim Mastnak e l'Austriac Andreas Prommegger. Benjamin Karl è era a la testa dal classament general. Ils Svizzers Gian Casanova e Dario Caviezel èn sin plazza 15, respectivamain 18.
