En il slalom a Saalbach èsi stà captivant enfin la fin. Loïc Meillard è stà 0,65 secundas pli plaun ch'il victur Timon Haugan (NOR). In pitschen sbagl avant la finiziun ha custà temp al Svizzer e la finala er ina plazza sin il podest. Sin il segund plaz è Manuel Feller (AUT) vegnì, Linus Strasser da la Germania è vegnì terz.
Al davos slalom ha er Marc Rochat mussà ina buna prestaziun cun ses sisavel plaz (+0,92), Luca Aerni è vegnì 14avel e Daniel Yule 16avel. Timon Haugan ha en la davosa cursa da slalom anc procurà per ina victoria per Norvegia. El è stà per l'emrpima giada insumma sisum il podest.
Feller - il meglier en la disciplina da slalom
Victur da la culla pitschna da slalom è Manuel Feller. El aveva gia gudagnà il classament da disciplina avant l'ultima cursa. Malgrà quai ha el anc ina giada dà gas e fatg 80 puncts. Suenter la cursa ha el pudì giudair la surdada da la culla avant publicum indigen a sia cursa da chasa a Saalbach.
Proxima fin d'emna èn anc las ultimas cursas da speed a Saalbach-Hinterglemm. Suenter quellas èn las cursas da cuppa mundiala terminadas per questa stagiun.
