Sportist da l'onn è vegni sco l'onn passà Marco Odermatt, il skiunz da 25 onns ha dominà la stagiun da skis. El è vegnì campiun olimpic en il slalom gigant a Peking e ha gudagnà sco emprim Svizzer dapi 12 onns il classament general da la cuppa mundiala.
Tar las dunnas è vegnida undrada Mujinga Kambundji per las segunda giada suenter il 2019 sco meglra sportista da l'onn. La curridra ha gudagnà aur al campiunadi europeic a Minca sur ils 200 meters ed argient sur ils 100 meters. En pli è ella vegnida campiuna mundiala sur 60 meters en la halla.
Premi d'onur per Roger Federer
Ministra dal sport Viola Amherd ha surdà in premi d'onur a Roger Federer per sia carriera extraordinaria. Il maestro da tennis e probablamain il pli grond sportist svizzer da l'istorgia s'ha retratg quest onn dal sport professiunal suenter ina lunga carriera plain success.
Sco l'onn passà è la squadra naziunala svizra da ballape vegnida undrada sco squadra da l'onn. Perfin per l'otgavla giada è vegni undrà il sportist en sutga cun rodas Marcel Hug.
