Il quartet svizzer cun las trais soras Aita, Selina ed Elisa Gasparin e Lena Häcki n'han betg persvas en la staffetta dals campiunadis mundials a Pokljuka. Ellas han terminà la cursa sin plaz 12. Sco gia avant in onn ad Antholz ha gist la rutinada Selina Gasparin insumma betg pudì mussar la prestaziun ch'ins è disà dad ella. Cun ina runda da chasti ha ella disfavurisà fermamain las Svizras.
Il titel da campiunessas mundialas da la staffetta da las dunnas va a las Norvegiaisas – quai malgrà ch'ellas han stuì rechargiar 11 giadas. Argient va a las Tudestgas e bronz a las dunnas da l'Ucraina. Las top trais èn stadas classadas aifer 10 secundas.
Umens manchentan top 10
Er ils umens han sco las dunnas manchentà ina plazza tranter la top 10. Suenter trais rundas da chasti èn ils biatlets svizzers vegnids a la fin 11avels. Il quartet è partì bain en la cursa, dentant gist Jeremy Finello, il meglier currider dal quartet ed il Grischun Serafin Wiestner n'han betg pudì persvader. Avant avevan Niklas Hartweg e Benjamin Hartweg lantschà bain ils biatlets – suenter la mesadad da la cursa eran ils Svizzers cun 20 secundas retard sin posiziun 6.
Er qua è il titel ì a la squadra da la Norvegia, quai avant la Svezia e la Russia.
