Siglir tar il cuntegn

Header

cuntegn

Stagiun dal HCD fin ussa Bun, ma i va anc meglier

Suenter bun la mesadad da la stagiun (27 da 52 gieus èn dads) sa chatta il Club da hockey da Tavau sin plazza 4 da la tabella. Ils Grischuns èn pia sin curs direcziun playoffs.

Perfetga n’è la stagiun betg stada per il HCD fin qua. Dentant n’ha l’equipa er betg laschà starmentar da fasas pli grevas. Spezialmain da mez october fin mez november ha Tavau gì da cumbatter cun bleras blessuras ed uschia n’han era ils resultats betg constà pli.

Impurtant è segir ch'il HCD ha gì in bun cumenzament da la stagiun. Là saja segir vegnì mess la basa, manegia il defensur Claude-Curdin Paschoud. Ed er las ultimas emnas ha Tavau puspè persvas cun in ferm hockey. Avant la terrada da la dumengia cunter ils ZSC Lions, avevan ils Grischuns gudagnà quatter giadas en fila. Impurtant è che l'equipa chatta ina tscherta constanza.

La liga è guliva e perquai èsi cler ch'i vegn a restar fin la fin in dir cumbat per las sis plazzas fixas en ils playoffs. L'avantatg dal HCD sin plazza 7 è mo trais puncts.

audio
Bilantscha dal HDC suenter la mesadad da la stagiun
ord Actualitad dals 05.12.2022. Maletg: Keystone
laschar ir. Durada: 3 minutas 24 Secundas.

Paschoud giauda da puspè esser ina part da l'equipa

Il defensur da 28 onns ha gì grevs onns. Dapi la stagiun 2018/2019 ha el cumbattì cun ina stremblida dal tscharvè che ha mess en privel la carriera da Paschoud. Igl è stà in lung cumbat enavos. Tant pli led saja el uss da puspè esser ina vaira part da l'equipa, di il giugader rumantsch. Claude-Curdin Paschoud è stà en tuts 27 gieus sin il glatsch ed ha rimnà quatter assists. El saja anc vid chattar ses optimal gieu, ma i vegnia meglier e meglier.

Claude-Curdin Paschoud en montura da hockey.
Legenda: Claude-Curdin Paschoud ha dà fin qua tut ils 27 gieus da campiunadi per il HCD. Keystone
Igl è bel che questas emoziuns sin glatsch èn puspè part da mia vita.
Autur: Claude-Curdin Paschoud giugader da hockey

I na sajan betg stads simpels onns, declera il giugader ch'è enconuschent per ses bun gieu defensiv. Uss saja simplamain bel da puspè avair las emoziuns ch'ins haja sco giugader da hockey.

RTR actualitad 07:00

Artitgels legids il pli savens