Ditg hai guardà ora sco che l’Argentina e Lionel Messi gudagnassan senza problems il titel, e quai suenter 90 minutas. Suenter in foul encunter Angel di Maria en la zona da penalti ha Lionel Messi manà ils Argentins en la 23avla minuta cun 1:0 en avantatg. 13 minutas pli tard ha lura di Maria finì ina cunterattatga spectaculara e fatg il 2:0. Il trenader dals Franzos Didier Deschamps ha reagì e midà ora Ousame Dembélé ed Olivier Giroud per Randal Kolo Muani e Marcus Thuram.
Suenter bun in'ura dal gieu ha la Frantscha zic a zic chattà la via en il gieu. En la 80avla minuta ha la Frantscha survegnì in penalti suenter in foul cunter Muani. Il superstar Kylian Mbappe ha pudì scursanir al 1:2 e be ina minuta pli tard ha il collega d'equipa da Lionel Messi tar Paris St. Germain pudì egualisar il gieu al 2:2.
In crimi incredibel
Nagina decisiun en il temp regular, il final ha cuntinuà cun ina prolungaziun da duas giadas 15 minutas. E scenarists da Hollywood na fissan betg stads buns da scriver in’istorgia pli dramatica en questa prolungaziun. En la 109avla minuta sajetta Lionel Messi a moda spectaculara il 3:2 per ils Sidamericans. Ma durant ch'ils Argentins eran danovamain gia cun in maun vi da il buccal ha l'arbiter danovamain mussà sin il punct da penalti suenter che l'Argentin Gonzalo Montiel ha tutgà la balla cun il maun avant ses agen gol, quai suenter in sajet da distanza dals Franzos. Kylian Mbappe ha puspè prendì la responsabladad ed anc ina giada egualisà il gieu cun ses terz gol en quest final e l'otgavel gol dal turnier.
Suenter in 3:3 suenter 120 minutas ha la lutga da penaltis stuì decider tge equipa che daventa per la terza giada campiun mundial. Durant ch'ils dus stars da mintga equipa Kylian Mbappe e Lionel Messi han danovamain mussà lur classa e nizzegià lur penalti n'han ils dus Franzos Kingsley Coman ed Aurélien Tchouaméni betg tutgà per la «grande nation». Ils Argentins han percunter mintgamai tutgà il gol uschia che Lionel Messi ha tuttina anc pudì encurunar sia carriera extraordinaria cun l'ultim titel che mancava anc en ses palmarès.
Bronz a la Croazia
Il final pitschen ha la Croazia gudagnà sonda suentermezdi cun 2:1 cunter il Maroc grazia a gols da Josko Gvardiol e Mislav Orsic, il 1:1 temporar per il Maroc tras Achraf Dari n'è betg stà avunda per l'equipa da surpraisa da l'Africa dal Nord. Per ils Croats n'è ina medaglia al campiunadi mundial betg insatge nov. Els èn stads avant quatter onns en il final dal campiunadi mundial e dal 1998 èn els gia ina giada vegnids terz.
