Siglir tar il cuntegn

Header

video
Ils puncts culminants dal gieu Argentina – Frantscha
Or da FIFA WM 2022 dals 18.12.2022.
laschar ir. Durada: 6 minutas 10 Secundas.
cuntegn

Suenter 120 minutas pari 3:3 L’Argentina è campiun mundial 2022

L’Argentina è per la terza giada campiun mundial suenter il 1978 ed il 1986. La Albiceleste sco la naziunala argentina vegn era numnada cun lur chapitani Lionel Messi ha gudagnà in gieu dramatic encunter il defensur dal titel, la Frantscha, quai suenter ina lutga da penaltis.

Ditg hai guardà ora sco che l’Argentina e Lionel Messi gudagnassan senza problems il titel, e quai suenter 90 minutas. Suenter in foul encunter Angel di Maria en la zona da penalti ha Lionel Messi manà ils Argentins en la 23avla minuta cun 1:0 en avantatg. 13 minutas pli tard ha lura di Maria finì ina cunterattatga spectaculara e fatg il 2:0. Il trenader dals Franzos Didier Deschamps ha reagì e midà ora Ousame Dembélé ed Olivier Giroud per Randal Kolo Muani e Marcus Thuram.

video
Lionel Messi tegn ad aut il buccal da campiun mundial
Or da FIFA WM 2022 dals 18.12.2022.
laschar ir. Durada: 48 Secundas.

Suenter bun in'ura dal gieu ha la Frantscha zic a zic chattà la via en il gieu. En la 80avla minuta ha la Frantscha survegnì in penalti suenter in foul cunter Muani. Il superstar Kylian Mbappe ha pudì scursanir al 1:2 e be ina minuta pli tard ha il collega d'equipa da Lionel Messi tar Paris St. Germain pudì egualisar il gieu al 2:2.

In crimi incredibel

Nagina decisiun en il temp regular, il final ha cuntinuà cun ina prolungaziun da duas giadas 15 minutas. E scenarists da Hollywood na fissan betg stads buns da scriver in’istorgia pli dramatica en questa prolungaziun. En la 109avla minuta sajetta Lionel Messi a moda spectaculara il 3:2 per ils Sidamericans. Ma durant ch'ils Argentins eran danovamain gia cun in maun vi da il buccal ha l'arbiter danovamain mussà sin il punct da penalti suenter che l'Argentin Gonzalo Montiel ha tutgà la balla cun il maun avant ses agen gol, quai suenter in sajet da distanza dals Franzos. Kylian Mbappe ha puspè prendì la responsabladad ed anc ina giada egualisà il gieu cun ses terz gol en quest final e l'otgavel gol dal turnier.

Il palmarès da Lionel Messi

Avrir la box Serrar la box
  • 7x il Ballon d’Or
  • 10x la liga spagnola
  • 1x la liga franzosa
  • 4x la Champions League
  • 7x la cuppa spagnola
  • 3x la cuppa mundiala dals clubs
  • 3x la supercuppa da l’europa
  • 8x la supercuppa da la Spagna
  • 1x la cuppa continentala da l’America dal Sid
  • 1x aur als gieus olimpics
video
La lutga da penaltis tranter l'Argentina e la Frantscha
Or da FIFA WM 2022 dals 18.12.2022.
laschar ir. Durada: 48 Secundas.

Suenter in 3:3 suenter 120 minutas ha la lutga da penaltis stuì decider tge equipa che daventa per la terza giada campiun mundial. Durant ch'ils dus stars da mintga equipa Kylian Mbappe e Lionel Messi han danovamain mussà lur classa e nizzegià lur penalti n'han ils dus Franzos Kingsley Coman ed Aurélien Tchouaméni betg tutgà per la «grande nation». Ils Argentins han percunter mintgamai tutgà il gol uschia che Lionel Messi ha tuttina anc pudì encurunar sia carriera extraordinaria cun l'ultim titel che mancava anc en ses palmarès.

Bronz a la Croazia

Il final pitschen ha la Croazia gudagnà sonda suentermezdi cun 2:1 cunter il Maroc grazia a gols da Josko Gvardiol e Mislav Orsic, il 1:1 temporar per il Maroc tras Achraf Dari n'è betg stà avunda per l'equipa da surpraisa da l'Africa dal Nord. Per ils Croats n'è ina medaglia al campiunadi mundial betg insatge nov. Els èn stads avant quatter onns en il final dal campiunadi mundial e dal 1998 èn els gia ina giada vegnids terz.

RTR novitads 16:00+

Artitgels legids il pli savens

Scrollar a sanestra Scrollar a dretga