Il podest dal super-g dals umens:
- James Crawford (CAN) 1:07.22
- Aleksander Aamodt Kilde (NOR) +0.01 secundas
- Alexis Pinturault (FRA) +0.26 secundas
Marco Odermatt era stà en tut ils super-G’s da la stagiun sin il podest. Quatter da sis super-G’s ha il skiunz da 25 onns schizunt gudagnà, quai a Lake Louise, a Bormio e duas giadas a Cortina d’Ampezzo. Ina buna prestaziun ha Odermatt er mussà al punct culminant da la stagiun, dentant betg buna avunda per gudagnar sia emprima medaglia a campiunadis mundials.
Ils resultats dals Svizzers:
- 4. Marco Odermatt +0.31 secundas
- 8. Loïc Meillard +0.65 secundas
- 19. Stefan Rogentin +1.56 secundas
- Gino Caviezel DNF
Er a Loïc Meillard n’hai betg tanschì per cumbatter per ina medaglia. Malgrà ina cursa fitg solida hai be tanschì per il 8avel plaz. Trumpà han ils dus Grischuns. Stefan Rogentin ha pers bler temp en la part tecnica cun il caracter da slalom gigant e Gino Caviezel è crudà ora gia baud. Ils dus skiunzs da Lai survegnan dentant anc ina segunda schanza, Rogentin en la cursa rapida e Caviezel en il slalom gigant.
James Crawford gudogna crimi da tschientavels
Per la surpraisa ha James Crawford procurà. Il Canadais che tuttina vegls sco Marco Odermatt ha battì il segund grond favurit, il Norvegiais Aleksander Aamodt Kilde per in sulet tschientavel. Per Crawford èsi il pli grond success da la carriera. Ina medaglia aveva il Canadais er gia gudagnà avant in onn als gieus olimpics a Peking. Là er’el vegnì terz en la cumbinaziun. En la cuppa mundiala è James Crawford stà fin oz trais giadas sin il podest, per ina victoria n’hai però anc mai tanschì.
