Omadus han merità in plaz da partenza grazia a bunas prestaziuns en questa disciplina en quella stagiun. Gino Caviezel è stà classà en sis super-G’s trais giadas sut ils top 10. A Beaver Creek en ils Stadis Unids ha el sco quart manchentà be per pauc il podest. Tanschì ina giada per in plaz da podest hai perencunter a Stefan Rogentin. El è vegnì al super-G da chasa a Wengen segund. Plinavant è Rogentin era stà sut ils top 10 a Lake Louise ed a Bormio.
Gino Caviezel po ir a la partenza cun il savair ch’el era vegnì terz en questa disciplina avant in onn tar il final da skis a Courchevel. E Stefan Rogentin ha sco paucs auters gia dastgà parter quest’emna ina giada ad in super-G sin questa plaunca. El ha nizzegia il super-G da la cumbinaziun sco trenament sin questa cursa.
Odermatt il grond favurit
Il grond trumf svizzer è dentant Marco Odermatt. El parta schizunt sco grond favurit. Odermatt è stà en tut ils super-G’s da la stagiun sin il podest, quatter da sis super-G’s ha el schizunt gudagnà. Ses pli grond concurrent en il cumbat per la medaglia dad aur è il Norvegiais Aleksander Aamodt Kilde. Schanzas da medaglia ha dentant er il quart svizzer, Loïc Meillard che vul er far revantscha per il 6avel plaz en la cumbinaziun.
Il super-G dals umens cumenza a las 11:30 uras.
Ils numers da partenza dals Svizzers:
- 2 Loïc Meillard
- 7 Marco Odermatt
- 11 Stefan Rogentin
- 15 Gino Caviezel
