L'equipa svizra da ciclissem artistic ha fatg aur al campiunadi mundial da ciclissem a Glasgow. Da l'equipa fan part Vanessa Hotz, Carole Ledergerber, Stefanie Moos e Flavia Schürmann. Segund plaz ha fatg la Germania e terz plaz l'Austria. Al campiunadi mundial 2022 a Gent aveva la Svizra anc stuì sa cuntentar cun argient davos ils Tudestgs en la medema constellaziun.
Svizras senza medaglia sin via
Main bun guardi ora da la cursa sin via da las dunnas. Bain hai dà duas plazzas da top ten, ma nagina medaglia svizra. Marlene Reusser è vegnida quarta cun 5 secundas retard sin bronz e 12 sin aur. Elise Chabbey – ch'è stada ditg suletta a la testa – è la finala vegnida 7avla. Gudagnà ha la Beltga Lotte Kopecky avant l'Ollandaisa Demi Vollering e la Danaisa Cecilie Ludwig.
Janis Baumann cuntanscha plaz da top 10
Il mountainbiker dad Igis è vegnì 10avel en la cursa da cross-country dals umens U23. Uschia ha el cuntanschì sia finamira da far in plaz sut ils top 10. Sin il victur, il Brit Charlie Aldridge ha Baumann pers 2:46 minutas. Il Grischun da 21 onns ha uschia pudì mussar gist en la pli impurtant cursa da la stagiun sia meglra prestaziun.
Grazia a Dario Lillo ha er in Svizzer pudì far il pass sin il podest. Il grond trumf che veva gia gudagnà aur cun la staffetta svizra en il Team Relay è vegnì terz cun in retard da be 29 secundas sin il victur Charlie Aldridge. Argient ha gudagnà il Franzos Adrien Boichis (+13 secundas).
Duas medaglias per Celine van Till
Suenter aur en la cursa encunter l'ura ha la para-ciclista da Genevra, Celine van Till gudagnà argient en la cursa sin via, categoria T2. Gudagnà la cursa da 31,2 kilometers ha Emma Lund dal Danemarc, terza è Jana Majunke da la Germania.
Il sulet um svizzer en la categoria T1, Fabiano Wey, ha fatg otgavel, da nov ciclists en sia categoria.
Nagina medaglia per Reusser
Per Marlen Reusser datti ina trumpada. La favurita da la cursa cunter l'ura ha dà si suenter la mesadad da la cursa. Campiunessa mundiala da la cursa cunter l'ura è daventada l'Americana Chloé Dygert. Elena Hartmann ch'ha ragischs grischunas fa plaz 22.
Pli tard en in'intervista cun la televisiun SRF ha Marlen Reusser explitgà, ch'ella n'haja betg dà si la cursa pervi d'in problem tecnic, mabain perquai ch'ella haja vulì dar si en quest mument. Ella haja sentì durant ir ch'ella na saja betg pronta per questa cursa cunter l'ura. Ella dovria uss ina pausa, ha la dunna da 31 onns agiuntà. Ed ella n'ha perfin betg exclus, da puspè esser a la partenza tar la cursa sin via da la dumengia.
Argent per la para-ciclista Flurina Rigling
Als campiunadis mundials a Glasgow en Scozia ha la para-ciclista Flurina Rigling gudagnà sia quarta medaglia per la Svizra. La Turitgaisa da 26 onns ha fatg argient tar la cursa da 17 kilometers cunter l'ura. Gudagnà ha la Tudestga Maike Hausberger cun 15 secundas avantatg sin la Svizra ch'ha gì in pneu plat.
Svizra defenda il titel en la cursa da team encunter l'ura
La Svizra ha defendì ses titel da campiun mundial en la cursa d'equipa maschadada encunter l'ura a Glasgow. Ils dus trios cun Stefan Bissegger, Stefan Küng e Mauro Schmid tar ils umens, e cun Marlene Reusser, Elise Chabbey e Nicole Koller tar las dunnas han gudagnà la concurrenza, quai malgrà che Marlene Reusser è cupitgada durant sia cursa.
La finala han ils Svizzers tuttina pudì triumfar sco avant in onn, questa giada piz a cup avant ils Franzos (+7,08 secundas). La medaglia da bronz gudognan ils Tudestgst.
La Svizra è uschia l'emprima naziun che vegn da defender il titel en questa anc giuvna disciplina ed insuma gudagnar duas giadas aur a campiunadis mundials.
Camille Balanche gudogna argient en il downhill
Suenter il quart plaz als davos campiunadis mundials avon in onn a Les Gets en Frontscha daventa Camille Balanche vicecampiunessa mundiala da downhill a Glasgow en la Scozia. Stada pli sperta che Balanche è sulet la gronda favurita austriaca Valentina Höll. Cumplettà il podest sco terza ha la Franzosa Marine Cabirou.
Per Camille Balanche èsi la terza medaglia a campiunadis mundials. Il 2020 a Leogang aveva la sportista da Neuchâtel gudagnà aur, in onn pli tard bronz en la Val di Sole en l'Italia.
