Suenter il pari trumpant dad 1:1 en il prim gieu dal campiunadi mundial cunter il Qatar è la naziunala svizra oz stada sut squitsch da mussar dapli prestaziun. En il segund gieu da gruppa è l'equipa da Murat Yakin fruntada sin la Bosnia-Erzegovina e finalmain èsi reussì a la squadra naziunala d'ir per l'emprima victoria cun in resultat da 4:1 – quai cunzunt grazia als «jokers» Manzambi e Vargas. Ma era Xhaka ha curt avant la fin anc sigllià la victoria svizra cun in penalti la 97avla minuta, durant il temp da prolungaziun.
Per omaduas equipas èsi stà in duel da gronda muntada – il success ha augmentà marcantamain las schanzas sin la fasa da k.0 – en quai cas per la Svizra. Cun questa victoria ha la Svizra rimnà ses emprims trais puncts ed ha fatg in pass impurtant en direcziuns da l'otgavelfinal. Ils Bosniacs, che fissan era stads dependents da quels trais puncts suenter lur remis cunter il Canada, ston empruvar lur cletg en la proxima partida.
Per quellas squadras vai questa saira
-
Bild 1 von 2. La Svizra vegn manada dal capitani Granit Xhaka. Bildquelle: Keystone.
-
Bild 2 von 2. La Bosnia-Erzegovina vegn manada dal capitani Edin Džeko. Bildquelle: Keystone.
Cun giugaders rutinads sco Granit Xhaka da la vart svizra sco er Edin Džeko dals Bosniacs èsi stà da quintar cun il duel plain tensiun, intensitad e blera brisanza – era periva da las ragischs d'intgins giugaders svizzers en il Balcan. Ma la surpraisa: igl èn cunzunt stads ils uschenumnads «jokers», ch'il trenader Murat Yakin ha clamà sin la plazza durant la segunda mesadad che pariva fin lura plitost flaivla, ch'han fatg impressiun en questa segunda partida.
Svizra cun schlettas regurdientschas
Nauschas regurdientschas ha la naziunala svizra dal tuttafatg da la Bosnia-Erzegovina. En il sulet duel da las duas equipas fin uss en il Letzigrund a Turitg hai dà ina terrada.
Ils gols per ils giasts han sajettà Edin Džeko e Miralem Pjanić. Diesch onns pli tard sa porscha a la naziunala svizra sin il palc dal campiunadi mundial la schanza da far emblidar la suletta terrada cunter la Bosnia.
Tensiun sin e sper la plazza
Ma co vegn quest duel spezial percepì da persunas ch'èn colliadas cun ils dus pajais? Ari Kotoric, in fan da ballape che ha ragischs bosniacas e viva en Svizra, raquinta co ch'el percepescha questa situaziun. En l'intervista cun RTR discurra el sur las emoziuns ch'il gieu chaschuna tar el, sche ses cor batta oz plitost per la Svizra u per la Bosnia e co ch'el viva l'inscunter tranter sias ragischs e sia patria.
Ari Kotoric ha 34 onns, naschì e creschì en Svizra, ma sia famiglia deriva da la Bosnia. Ses cor batta per omaduas terras.
RTR: Quant speziala è questa partida per Vus?
Ari Kotoric: Ils dus pajais che jau am il pli fitg giogan in cunter l'auter. Las ragischs giogan cunter il pajais che jau viv uss, che jau sun creschì si, en il qual jau sun daventà la persuna che jau sun oz – jau crai dapli na stoss jau betg dir.
E tge fa quai cun las emoziuns e tge fiss il resultat perfetg?
Fitg emoziunal. Ins vul che omadus gudognan. Jau schess in pari fiss il meglier. In 3:3, blers gols, bleras acziuns interessantas. Omaduas equipas ston e vulan gudagnar, perquai crai jau ch'i daventa er uschè in gieu.
Co reagis Vus sin in gol per la Svizra u per la Bosnia?
Sch'els na giogan betg gist in cunter l'auter, lura giubilescha dad aut. Uss sch'i giogan in cunter l'auter ma legrel jau simplamain. Mintga gol mussa la qualitad da las squadras.
Sch'ina da las duas equipas croda ora, per tgi tegnan ins ils poleschs?
Dad omaduas varts. Sche la Svizra croda ora, tegna per la Bosnia e sutsura. Ma jau crai che omaduas equipas vegnan or da la fasa da gruppa. Jau ma legrel sin quels gieus.
E quant gronda è la gnervusitad?
Jau na sun betg pli gnervus, jau less simplamain giudair da pudair guardar co quels dus pajais giogan in cunter l'auter.
Co persequitais Vus il gieu?
Deplorablamain mo sur il live-ticker, jau hai da lavurar servetschs da notg per il mument. Vul dir che jau guard forsa mintgatant ina giada sin il telefonin e sun spannegià tge resultat ch'i vegn a dar.