Il campiunadi mundial da ballape na viva betg mo da la Spagna, la Frantscha u l'Argentina. Il 2026 stattan er naziuns sin il grond palc che blers fans strusch enconuschan. Intgins festiveschan lur emprima participaziun ad in campiunadi mundial insumma; Jordania, Usbekistan, Cap Verd e Curaçao, auters turnan suenter decennis; Haiti, Irac, Panama e la Republica Democratica dal Congo. Quests otg pajais preschentain nus en curts purtrets auditivs.
Ils quatter debutants
Jordania
Ballape ha giugà internaziunalmain ditg be ina rolla secundara, ma ils onns passads è il pajais sa sviluppà sportivamain vinavant. Il 2026 è la Jordania sa qualifitgada per l'emprima giada insumma per in campiunadi mundial da ballape – in success istoric per ils radund indesch milliuns abitants. La qualificaziun ha chaschunà euforia en l'entir pajais ed ha definitivamain fatg da l'equipa in simbol da la luschezza naziunala.
- La Jordania vala sco pajais il pli stabil en il Proxim Orient – il pajais che procura per stabilitad.
- Rai Abdulla il segund è grond fan da «Star Trek» ed ha perfin giugà ina pitschna rolla en la seria.
- Malgrà che la Jordania è l'emprima giada ad in campiunadi mundial, al campiunadi da l'Asia han els fatg il pass en il final.
-
Bild 1 von 3. Citad da grippa Petra. Bildquelle: Wikimedia.
-
Bild 2 von 3. Metropola da milliuns Amman. Bildquelle: Wikimedia.
-
Bild 3 von 3. La squadra naziunala da Jordania. Bildquelle: Keystone.
La Jordania tutga tar ils pajais dal Proxim Orient cun la pli grond'istorgia. Il reginam tranter l'Arabia Saudita, la Siria e l'Israel è enconuschent per la citad da grippa Petra, il desert Wadi Rum e la metropola da milliuns Amman.
Usbekistan
Pliras giadas ha l'Usbekistan fatg stretg naufragi tar la qualificaziun per il campiunadi mundial. Il 2026 è la finala gartegia il success istorica: Per l'emprima giada va la naziun ad in campiunadi mundial. La qualificaziun vala sco term impurtant per tut il ballape da l'Asia Centrala.
- Il turissem en l'Usbekistan scriva mintg'onn cifras da record – L'onn passà han 11,7 milliuns persunas visità il pajais.
- L'Usbekistan è in pajais dals extrems: La stad poi vegnir fin 50 grads chaud, l'enviern fin -40 grads.
- Il trenader naziunal è il grond star: campiun mundial, Fabio Cannavaro.
-
Bild 1 von 3. La citad Buchara en l'Usbekistan. Bildquelle: Wikimedia.
-
Bild 2 von 3. Registan: la plazza centrala maiestusa da la citad da Samarkand en l'Usbekistan. Bildquelle: Wikimedia.
-
Bild 3 von 3. La squadra naziunala d'Usbekistan. Bildquelle: Keystone.
L'Usbekistan sa chatta en l'Asia Centrala a la via da saida istorica ed è enconuschent per citads sco Samarkand u Buchara. Dapi l'independenza da l'Uniun sovietica ha il pajais investì fermamain en il ballape.
Cap Verd
Blers profis da ballape han ragischs famigliaras en l'Europa, surtut en il Portugal. Ditg valeva il Cap Verd sco outsider dal ballape african, è dentant sa sviluppà cuntinuadamain. Il 2026 ha la naziun insulara dumagnà per l'emprima giada la qualificaziun per ina runda finala dal campiunadi mundial – ina da las pli grondas surpraisas da la qualificaziun.
- Auter ch'en auters pajais africans, na datti nagins animals da tissi a Cap Verd.
- La bavronda naziunala dal Cap Verd è «Grogue» – in vin ars tradiziunal.
- L'anteriur giugader da la naziunala svizra Gelson Fernandes è naschì a Cap Verd.
-
Bild 1 von 3. Giuvenils ed uffants dattan ballape a la riva da Cap Verde. Bildquelle: Keystone.
-
Bild 2 von 3. Destillaziun dal vin ars «Grogue». Bildquelle: Wikimedia.
-
Bild 3 von 3. La squadra naziunala da Cap Verd. Bildquelle: Keystone.
Il Cap Verd, uffizialmain «Cabo Verde», è in pitschen stadi insular en l'Atlantic davant la costa da l'Africa dal Vest. Ils radund 600’000 abitants vivan sin inslas vulcanicas ch'èn enconuschentas per la musica, las splagias e l'emigraziun.
Curaçao
En connex cul ballape profitescha Curaçao da stretgas colliaziuns cun il Pajais Bass, blers giugaders èn vegnids scolads là. Il 2026 ha l'insla scrit istorgia: Curaçao è sa qualifitgà per l'emprima giada per in campiunadi mundial ed è in dals pli pitschens participants dal campiunadi mundial da tut ils temps. Per la Caribica è l'equipa ina da las grondas surpraisas dals ultims onns.
- A Curaçao vivan be circa tantas persunas sco a Losanna.
- La gronda part da la glieud da Curaçao discurra trais linguas: Papiamento, englais ed ollandais.
- Blers giugaders da Curaçao han emprendì da dar ballape en ils Pajais Bass.
-
Bild 1 von 2. La citad Willemstad a Curaçao. Bildquelle: Wikimedia.
-
Bild 2 von 2. La squadra naziunala da Curaçao. Bildquelle: Keystone.
Curaçao è ina pitschna insla da la Caribica cun radund 150’000 abitants e tutga tar il reginam dals Pajais Bass. L'insla è enconuschenta per chasas coluradas, rivas da siemi e per il famus liquor cun il medem num.
Dal «offside» enavos sin la gronda tribuna
Haiti
Haiti ha gia cuntanschì il 1974 ina giada ina runda finala dal campiunadi mundial, è silsuenter dentant svanì decennis a la lunga da la gronda tribuna. Cun la qualificaziun 2026 turna la naziunala uss enavos. Spezialmain emoziunal: Per blers Haitians en l'intern dal pajais ed a l'exteriur è il team in simbol rar positiv d'unitad naziunala.
Haiti è l'emprim stadi independent da l'America Latina e sa chatta sin l'insla caribica Hispaniola. Il pajais cumbatta dapi decennis cun catastrofas da la natira, povradad ed instabilitad politica – tant pli impurtant è il ballape sco purtader da speranza.
Irac
Gia il 1986 è la naziun sa participada ina giada ad in campiunadi mundial, suenter è l'equipa ditg restada senza schanzas. La qualificaziun per 2026 marchescha perquai in «comeback» sportiv. Il ballape iracais stat oz per resistenza e coesiun – malgrà in passà politic difficil.
L'Irac è in pajais cun ina ritga istorgia, vala sco pajais cun culturas autas da pli baud e sa chatta tranter l'Iran, la Siria e l'Arabia Saudita. Decennis da guerra e conflicts han er engrevgià il svilup dal sport. Tuttina posseda il ballape enorma impurtanza en l'Irac.
Panama
Il 2018 è il Panama sa qualifitgà per l'emprima giada per in campiunadi mundial ed ha uschia scrit istorgia da sport. Era il 2026 è l'equipa puspè da la partida e tutga entant tar las grondezzas fixas en il ballape da l'America Centrala. Spezialmain impressiunant: L'entusiassem en il pajais è enorm, malgrà ch'il baseball era tradiziunalmain ditg pli popular.
Il Panama collia l'America dal Nord e l'America dal Sid ed è enconuschent en tut il mund surtut pervi dal Chanal da Panama. Il pajais cun radund quatter milliuns abitants ha dapi onns in schlantsch economic, entant ch'il ballape daventa adina pli popular.
Republica Democratica dal Congo
Gia il 1974 è il Zaire da quella giada sa participà sco emprim pajais da l'Africa Centrala ad in campiunadi mundial. Pir il 2026 è reussì al DR Congo dad oz il return sin la gronda tribuna. Blers giugaders da l'equipa èn vegnids scolads sportivamain en l'Europa.
La Republica Democratica dal Congo è areguard la surfatscha in dals pli gronds pajais da l'Africa e ritg da resursas mineralas, cumbatta dentant dapi decennis cun conflicts ed instabilitad. Il ballape posseda perquai ina valur sociala spezialmain auta.