Il giugader da l'offensiva grischun Fabrizio Cavegn ha giugà la stagiun 2025/26 tar ils Bristol Rovers per l'emprima giada en il ballape professiunal englais. Suenter sia midada la stad 2025 dal FC Vaduz è il giuven da 23 onns sa sviluppà spert ad in giugader-clav en l'attatga dals «Pirates» – era sche l'equipa ha gì en tut ina stagiun cun auts e bass. Vers la fin da la stagiun ha il Lumnezian dentant gì be paucas minutas da gieu.
Suenter 46 gieus è la squadra da Cavegn cun 62 puncts sin il 14avel plaz da la quart-meglra liga englaisa. Quai munta en la liga cun 24 squadras ina rangaziun entamez la tabella.
El sez ha giugà en 43 da las 46 partidas da campiunadi – la gronda part èn la formaziun d'entschatta. Suenter in lung ed intensiv temp ha Cavegn pudì terminar la stagiun cun in sentiment positiv. El è numnadamain – ensemen cun in auter giugader – il campiun da gols da Bristol. Guardar sur tut la cumpetiziuns è el perfin stà en acziun en 51 gieus, nua ch'el ha sajettà totalmain 15 gols. Ina quota segiramain fitg solida.
Sch'insatge avess ditg a mai ch'jau dun 51 gieus e fetg 15 gols vess jau suttascrit quai. Ma cler, sco attatgader vuls adina dapli ed jau avess era savì far dapli gols.
Gist vers la fin da la stagiun ha l'equipa mussà ina furma cleramain ascendenta ed ha pudì festivar pliras victorias en seria. Cun 8 victorias en seria ed in pari en las ultimas 9 partidas èn ils Bristol Rovers stads en ina furma excellenta ed han uschia pudì meglierar lur entschatta da la stagiun mediocra.
Lumnezian sco meglier tiragols
Sco meglier tiragols dals Bristol Rovers – cun 11 gols – va el sco clera figura-clav offensiva en la fin da la stagiun. Dapi il davos gieu sto Cavegn però parter ses titel da meglier tiragols cun ses partenari attatgader Ellis Harrison.
In highlight da sia stagiun è segir stà ses emprim hattrick en l'Engalterra il 1. da schaner 2026 tar la victoria da 3:0 cunter Shrewsbury Town – in gieu, nua che Cavegn ha pudì mussar sias qualitads.
A la fin resta: Fabrizio Cavegn è arrivà tar ils Bristol Rovers ed ha fatg ina differenza cun ses gols. La stagiun mussa ch'el ha anc bler potenzial – e che quai pudess pir esser l'entschatta per il Lumnezian. Sperar sto il Grischun era ch'el survegnia la proxima stagiun puspè dapli temp d'acziun per mussar anc dapli.
Contract fin il 2028
Il Lumnezian ha adina ditg ch'ils Bristol Rovers duajan esser ina staziun intermediara. La quarta liga englaisa na duaja betg esser per adina sia patria en il ballape. Co ch'i giaja vinavant n'ha el betg tradì. El possia s'imaginar da restar tar ils Bristol Rovers, ma sche l'endretga offerta vegn fiss el er pront da far il proxim pass.
Fabrizio Cavegn na lascha betg guardar en las cartas sch'el resta u mida club?
Gian Carlo: Na, el è propi tras e tras profi e natiralmain na dastga el dir nagut, er sch'el savess schon insatge dapli. Uschia funcziuna il mund da ballape oz. El n'ha tradì nagut a RTR, sch'el resta u sch'el mida. Probabel na sa el era sez anc betg exact quai.
Ti has dentant fatg intginas retschertgas. Tge has chattà ora?
Gea, il mund da ballape è grond ed i vegn scrit bler sur da ballapedists, er sur da Fabrizio Cavegn. El è ina persuna che vegn discutada sin X u sin plattafurmas da ballape. Oravant tut en l'Engalterra ha el propi fatg in num l'onn passà.
Ina dumonda è, sch'el gioga anc ina gronda rolla en ils plans dal trenader Steve Evans, cunquai ch'el è bain stà en ils ultims gieus da campiunadi savens sin il banc da reserva.
Tenor plirs rapports en l'Engalterra han ils Bristol Rovers gia refusà in'offerta per Fabrizio Cavegn d'ina equipa che dat en la terza liga englaisa. Ins po leger che quai è stà Huddesfield Town. In'equipa che deva avant set onns anc en la Premier League.
Ins po plinavant era leger che Rotherham United duai avair in'egliada sin el. In club ch'è gist vegnì relegà da la terza en la quarta liga. Quai è dentant plitost mo insatge ch'ils fans da quest club scrivan. Pia el è ina persuna che vegn discutada e quai vegn segir era a restar uschia las proximas emnas.
E è turnar en Svizra in tema?
Actualmain na saja quai nagin tema, ha el ditg. El veglia star en l'Engalterra. Ma cler, nus savain, en il ballape vai magari spert.