Per blers mountainbikers ha cumenzà questa fin d’emna la nova stagiun, uschia er per Vital Albin ch'è partì la dumengia al Swiss Bike Cup a Gränichen. Vi da questa cursa aveva il Lumnezian da 24 onns fitg bunas regurdientschas. Avant in onn ha el numnadamain gudagnà questa cursa en il chantun Argovia.
Questa giada n'ha el dentant betg gì tant success. Gudagnà la cursa ha Luca Schwarzbauer da la Germania, suandà da Mathias Flückiger. Vital Albin perda 2:16 minutas e sa tschenta sin il tschintgavel plaz.
- Luca Schwarzbauer (GER) 1:25:06
- Mathias Flückiger (SUI) 1:25:35
- Jordan Sarrou (FRA) 1:26:37
Vital Albin è pront per la stagiun
Il 2022 ha Vital Albin gudagnà Gränichen, in dals gronds classichers dal Swiss Bike Cup, avant Andri Frischknecht. Il figl da la legenda Thomas Frischknecht n’è quest onn betg a la partenza. El parta ensemen cun Nino Schurter al Cape Epic, la cursa extrema sur otg etappas en l’Africa dal Sid.
