Or dals autpledaders dal stadion d'american football a Cuira resuna musica americana. Sin tribuna ves'ins ina massa fans cun tricots, placats en l'aria ed er ina mascotta che porta in tricot. In zic atmosfera sco avant in gieu d'american football en ils Stadis Unids, ma la cuntrada è in'autra: il stadion è circumdà da muntognas ed è sut il tschiel grischun. Nus n'essan betg insanua en la California, mabain a l'Obere Au a Cuira – al 39avel Swiss Bowl, il final d'american football en Svizra.
-
Bild 1 von 2. Ils Calanda Broncos vid sa stgaudar avant il gieu. Bildquelle: RTR.
-
Bild 2 von 2. Vista da la tribuna sin la plazza. Bildquelle: RTR.
Sin il plaz dus spetgan ils Calanda Broncos - l'equipa grischuna che tutga tar l'elita da football en Svizra. Il numer 68 dal team è Michel Derungs. El è sin il plaz cun la tipica chapellina da football, porta schanegiadas da las spatlas e giauda d'esser ina part dals Calanda Broncos.
Per mai èsi insatge spezial – jau hai era adina guardà l'american football en la televisiun, ed jau vom gugent en l'America. Perquai hai jau grond plaschair, che jau poss far quai tar nus a chasa.
Entant ch'ins discurra cun Michel Derungs, badan ins dentant, che l'american football è tuttina tut auter en Svizra che en ils Stadis Unids. «Jau na percorsch betg ina gronda atmosfera da l'USA», di Michel Derungs.
-
Bild 1 von 3. Ils Calanda Broncos avant il gieu. Bildquelle: RTR.
-
Bild 2 von 3. Il mascott dals Calanda Broncos. Bildquelle: RTR.
-
Bild 3 von 3. Il team sa stgauda avant il gieu. Bildquelle: RTR.
Intgins meters dasperas sa stgauda in'autra gruppa – ils cheerleaders dals Calanda Broncos. Er ellas fan part da l'episoda americana amez Cuira. Il coach dals cheerleaders, Shakira Perrotta, di dentant che la gruppa na vivia betg tant il stil american.
Nus na vivain betg uschè fitg il stil american – era perquai che nus na trenain betg uschè savens sco ils cheerleaders en ils Stadis Unids.
Els sa dattan dentant adina gronda fadia, punctuescha ella. Sin tribuna sesan var 2000 fans – per els n'è il flair american betg quai che definescha in gieu d'american football. Per ellas ed els èn la fascinaziun, l'atmosfera, la tensiun ed il s'inscuntrar cun auters fans bler pli impurtant.
-
Bild 1 von 4. Ils fans dils Calanda Broncos. Bildquelle: RTR.
-
Bild 2 von 4. Ils Calanda Broncos èn campiuns svizzers. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Il gieu tranter ils Calanda Broncos ed ils Basel Gladiators dura duas uras e mez. Ils fans giubileschan, sblatschan, chantan – e la fin gudognan ils Calanda Broncos. Tuttina sche aspectaturas, giugaders u cheerleadras, il Swiss Bowl mussa, che la passiun per l'american football viva era en la chapitala grischuna.
Ils Calanda Broncos restan campiuns svizzers en l'American Football. En il final dal Swiss Bowl a Cuira han ils Grischuns triumfà cun 41:28 cunter ils Basel Gladiators e festiveschan uschia il 14avel titel da campiun – il terz en seria. Ils Basilais han l'emprima giada dapi otg onns puspè cuntanschì in final.
Cun questa victoria ha l'equipa grischuna uschia puspè mussà ina giada ch'i dat en Svizra nagin'equipa che vegn da tegnair pitg ad els.
Insumma èsi stà ina stagiun quasi perfetga dals Broncos. Sulet en il final da la cuppa d'europa han els pers avant paucas emnas encunter il campiun franzos Thonon Black Panthers cun 21:28.