Siglir tar il cuntegn

Header

audio
Hockey: l'EHC Cuira na mida betg en la Swiss League
Or da Actualitad dals 15.02.2023. Maletg: EHC Cuira
laschar ir. Durada: 2 minutas 53 Secundas.
cuntegn

Swiss League Cuira na vul tuttina betg – Arosa mantegna speranza

Anc il december aveva il club da hockey da Cuira fatg la dumonda provisorica per far il pass en la segund'auta liga da hockey svizra. Pervia da la situaziun intscherta en la Swiss League han ils clubs dentant la pussaivladad da trair enavos la dumonda enfin mesemna, ils 15 da favrer. Quai ha Cuira uss fatg.

Motivs finanzials

En ina communicaziun a las medias scriva il club ch'i manchia las ressursas finanzialas per garantir in'existenza en la Swiss League. Vitiers dettia ulteriuras malsegirtads quai che pertutga il futur da la Swiss League. Perquai haja il club retratg la dumonda per la promoziun.

Tuttina menziuna il club enturn il president Christian Aliesch ch'els na veglian betg perder ord vista la Swiss League. Ensemen cun ils funcziunaris, partenaris, sponsurs, fans e gidanters dal club lavuran els vinavant vi da questa finamira per pudair far quest pass en ils proxims onns.

Arosa mantegna dumonda

L'EHC Arosa ha decidì da mantegnair la dumonda per ir ina liga ensi. Ils meds finanzials ch'els hajan chattà, il success sportiv ch'els hajan gì ils ultims onns, ils criteris simplifitgads per ir ina liga plinensi, la nova Swiss League, las perspectivas che fetschian pli grev da restar en la MyHockey League ed er ils signals positivs da la vischnanca, dal turissem e las pussaivladads da marketing, sajan tut facturs che gioghian ina rolla tar la ponderaziun da far part da la Swiss League.

Sportivamain eran omadus clubs sin buna via

Sportivamain era l'EHC Cuira sin buna via da far il pass en la segund'auta liga svizra. Suenter 30 gieus da qualificaziun è il club da la chapitala rangà sin plazza 2 da la MyHockey League. Arosa è actualmain sin plazza 3.

RTR novitads 23:00

Artitgels legids il pli savens