Il passlunghist da Tavau, Valerio Grond, fa da nov part al cader naziunal da Swiss Ski. Quai è ina da las grondas midadas en vista a la proxima stagiun. Quai mussan las selecziuns che la Federaziun svizra da skis ha publitgà oz. Dasper Grond è er Janik Riebli vegnì selecziunà per il pli aut cader svizzer. Vinavant part a quel fa Nadine Fähndrich. In pass ensi ha er Cla-Ursin Nufer pudì far. Il Tujetschin è da nov en il cader B. Jonas Baumann oriund da la Val Schons resta en il cader A sco er Nadja Kälin da San Murezzan u Alina Meier da Tavau.
Er en il biatlon han dus atlets pudì far il pass en il cader naziunal grazia a lur bunas prestaziuns durant la stagiun passada. Quai èn Niklas Hartweg e Sebastian Stalder. Las duas soras Elisa ed Aita Gasparin fan vinavant part al cader A ed Irene Cadurisch resta en il cader B da Swiss Ski. Terminà la carriera ha il biatlet da Trin, Serafin Wiestner.
Cologna cun mandat tar Swiss Ski
En la sparta passlung Dario Cologna ha suttascrit in contract sco cussegliader. Il Grischun metta punctualmain a disposiziun sia savida per exempel tar sesidas da trenaders, en camps da trenament u er tar concurrenzas, ha communitgà Swiss Ski. Ultra da quai rinforzeschan ina trenadra ed in trenader il team da passlung: Karolin Moen Guidon ed Erik Braaten. Uschia han ils umens e las dunnas mintgamain in duo da trenader e trenadra.
Or da l'archiv
Dal team-sprint a Livigno en l'Italia è il duo svizzer Janik Riebli e Valerio Grond ì sin il podest.
