Siglir tar il cuntegn

Header

video
Nadine Fähndrich gudogna sensaziunalmain il sprint a Tavau
Or da Sport-Clip dals 17.12.2022.
laschar ir. Durada: 3 minutas 46 Secundas.
cuntegn

Tavau Nordic 2022 Nadine Fähndrich scriva istorgia a Tavau

Cun las cursas da la cuppa mundiala da passlung a Tavau spetga sin atletas ed atlets svizzers in emprim punct culminant en questa stagiun. A las cursas da Tavau Nordic stattan sin il program la sonda in sprint e la dumengia ina cursa da distanza mintgamai en il stil liber.

Be in’emna suenter la victoria en il sprint classic a Beitostölen en la Norvegia stat Nadine Fähndrich puspè sisum il podest, e quai a la cursa da chasa a Tavau. Ella è uschia l’emprima Svizra che triumfescha a las cursas da Tavau Nordic. Tar ils umens è quai reussì fin oz be a Toni Livers il 2007. E Nadine Fähndrich è uss er l’emprima Svizra ch’ha gudagnà almain trais cursas singulas da la cuppa mundiala.

Nadine Fähndrich è gia stada en il prolog la pli sperta. Silsuenter ha ella dentant er gudagnà il quartfinal, il mezfinal ed il final. En il cumbat per las plazzas da podest ha ella la finala battì l’Americana Jessie Diggins ch’è vegnida segunda e la Svedaisa Johanna Hagstroem ch’è vegnida terza.

audio
Alina Meier davart ses sprint da chasa
ord Actualitad dals 17.12.2022. Maletg: Keystone
laschar ir. Durada: 3 minutas 16 Secundas.

Per las trais ulteriuras Svizras ch’han dumagnà la qualificaziun per ils finals, Alina Meier, Lea Fischer ed Anja Weber, è il sprint a Tavau stà a fin suenter il quartfinal.

Pellegrino batta Kläbo

Tar ils umens ha il Talian Federico Pellegrino procurà per il punct culminant. Il vice-campiun olimpic da Pyeongchang il 2018 e da Peking il 2022 ha sin ils davos meters battì il grond favurit, il Norvegiais Johannes Hösflot Kläbo ch’ha uschia stuì sa cuntentar cun il segund plaz. Per Pellegrino èsi gia la quarta victoria a Tavau. Cumplettà il podest sco terz ha il Franzos Lucas Chanavat ch’era stà il pli spert en la qualificaziun.

video
Pellegrino surpassa Kläbo paucs meters avant l'arrivada.
Or da Sport-Clip dals 17.12.2022.
laschar ir. Durada: 2 minutas 36 Secundas.

Meglier Svizzer è stà Janik Riebli, il sulet atlet da Swiss Ski ch’ha cuntanschì il mezfinal. En quest mezfinal n’ha Riebli però gì nagina schanza da cumbatter per in plaz en il final cun ils megliers sis. Il dus ulteriurs Svizzers ch’han dumagnà la qualificaziun per ils finals cun ils megliers 30, Roman Schaad e Cyril Fähndrich, è la cursa da sprint stada a fin suenter il quartfinal. Betg a la partenza è stà il grond trumf svizzer tar ils umens, Valerio Grond da Tavau, quai pervia d’ina malsogna.

Nadine Fähndrich dominescha la qualificaziun

Ord vista svizra ha suenter l’èra Dario Cologna sulettamain Nadine Fähndrich schanzas realisticas sin ina plazza da podest. La Lucernaisa vala schizunt sco ina da las favuritas en il sprint da la sonda. Avant in’emna ha Fähndrich gudagnà il sprint en il stil classic a Beitostölen en la Norvegia ed uschia festivà sia segunda victoria en ina cursa singula da la cuppa mundiala. A Tavau, nua ch’ella è vegnida segunda avant in onn, vegn la passlunghista da 27 onns sustegnida da ses club da fans e sia famiglia.

Nadine Fähndrich
Legenda: Nadine Fähndrich procura per ina gronda festa da passlung a Tavau. Keystone

En il prolog è Nadine Fähndrich stada la pli sperta. Ella ha gudagnà la qualificaziun cun in avantatg da bunamain duas secundas sin la Norvegiaisa Tiril Udnes Weng. Cun Lea Fischer sco 18avla, Anja Weber 21avla ed Alina Meier da Tavau sco 23avla han anc trais ulteriuras Svizras cuntanschì ils finals che cumenzan cun ils quartfinals.

Be trais Svizzers en ils finals

En il prolog dals umens ha principal Janik Riebli persvadì sco 5avel. Sin il pli spert en la qualificaziun, il Franzos Lucas Chanavat, ha Riebli pers be bun duas secundas. Sa qualifitgads per ils quartfinals èn era Roman Schaad sco 15avel e Cyril Fähndrich, il frar da Nadine Fähndrich, sco 22avel. Il grond favurit, il Norvegiais Johannes Hösflot Klaebo è stà il segund spert en la qualificaziun.

Cologna l'emprima gia al microfon

Preschent a las cursas da la cuppa mundiala a Tavau è er Dario Cologna, quai dentant betg pli sco atlet mabain sco co-commentatur tar ils collegas da SRF. A las cursas da chasa è d’udir l’emprima giada en televisiun il commentari da Cologna, il star svizzer da passlung ch’ha terminà la fin da la stagiun passada sia lunga carriera.

Dario Cologna
Legenda: Dario Cologna da nov davos il microfon da SRF. Keystone

RTR Actualitad

Artitgels legids il pli savens