Nadina Fähndrich ha mussà ina fitg buna cursa ed ha oravant tut partì en bain ils 20 kilometers. La passlungista da 27 onns ha da runda tar runda fatg bun intgins plazs. La finala ha Fähndrich pers gnanc ina minuta sin la victura americana Jessie Diggins.
Show americana sin la loipa da Tavau
Cun la victoria da Jessie Diggins ed il terz plaz da Rosie Brennan (+11,2 sec.) han las Americanas procurà per la musica en la cursa da distanza sur 20 kilometers el pe dal Flüela. Tranter las duas Americanas è la Norvegiaisa Ingvild Flugstad Oestberg (+5,5 sec.) classada sco segunda.
Giuliana Werro ha stuì morder
Per l’Engiadinaisa Giuliana Werro èsi en emprima lingia ì per rimnar experientscha a la cursa da chasa a Tavau. La giuvna da 23 onns è dentant stada malsauna ils davos dis ed ha pir curt avant la partenza decidì da tuttina sa metter sin loipa. Werro ch’ha astgà parter per la terza giada en roda a la cuppa mundiala da Tavau ha la finala pers 7:24 minutas sin Jessie Diggins ed uschia stuì sa cuntentar cun il 42avel plaz. Damai ch’i dat a partir da questa stagiun puncts per las meglras 50 ha er ella uschia gudagnà ses emprims puncts da la cuppa mundiala.
In zic meglier èsi ì ad Anja Weber ch’ha terminà la cursa sco 36avla. La Turitgaisa ch’è er da chasa en il triatlon ha pers 5:09 minutas.
4 Svizzers sut ils top 30
En l’emprima cursa da distanza dals umens a Tavau suenter l’èra Dario Cologna han ils Svizzers persvadì, oravant tut Jonas Baumann. Il currider da Lon en la Val Schons è vegnì 17avel. Be dus plazs davos Baumann è classà Cyril Fähndrich, il frar da Nadine Fähndrich. Per il giuven da 23 onns è quai 19avel plaz il meglier resultat da sia carriera. Cun Candide Pralong sco 25avel e Beda Klee sco 29avel han anc dus ulteriurs svizzers pudì far il pass sut ils top 30.
Dominanza norvegiaisa
Dominà la cursa da 20 kilometers en il stil liber han ils Norvegiais, quai tras e tras. Simen Hegstad Krüger ha triumfà cun in avantatg da 20 secundas avant ses dus cumpatriots Hans Christer Holund e Sjur Röthe. Er sin plaz 4 fin 6 en classads trais norvegiais.
Suenter la pausa da Nadal vai vinavant cun il Tour de Ski che cumenza ils 31 da december en la Val Müstair. A fin va quest punct culminant ils 8 da schaner en la Val di Fiemme.
