Siglir tar il cuntegn

Header

cuntegn

Tennis dubel Bencic e Golubic gudognan argient

La 12avla medaglia svizra als gieus olimpics a Tokio traglischa en argient. Las duas giugadras Belinda Bencic e Viktorija Golubic han pers en il final dal dubel encunter il duo Tschec da Barbora Krejcikova e Katerina Siniakova, cun 5:7 ed 1:6.

video
Ils highlights dal final en il dubel da las dunnas
Or da Tokyo 2020 Clips dals 01.08.2021.
laschar ir

Be radund 15 uras suenter la victoria emoziunala da Belinda Bencic en il final dal singul, han las duas Svizras pudì tegnair pitg a las duas Tschecas be durant l'emprim set. Ditg èn ellas sa dustadas encunter in break. Ma cura che Golubic ha stuì dar giu sia battida al 5:6 è quai gia quasi stà la decisiun. Suenter han las duas Svizras be pli gudagnà in game, la battida n'han ellas betg survegnì enavos.

video
Golubic: «Avain gudagnà argient e betg pers aur»
Or da Tokyo 2020 Clips dals 01.08.2021.
laschar ir

Naginas reservas da forza pli

En l'ultim game han ellas bain anc ina gaida cumbattì quatter ballas da match, il gieu n'han ellas dentant betg pli pudì volver a lur favur. Las duas Tschecas èn stadas memia fermas. Er las reservas da forza n'eran betg pli qua. Bencic ha stuì ir trais giadas sur trais sets tar ses cumbat per la medaglia d'aur. Ed er ils termins da pressa ha ella gì a fin la notg pir suenter mesanotg.

Tuttina pon las duas Svizras esser cuntentas. Suenter che Toger Federer, Stan Wawrinka e Jil Teichmann han stuì ceder pervi da blessuras, restan be pli Bencic e Golubic tar la delegaziun svizra. Persuenter han ellas fatg duas medaglias e cun quai dumagnà l'optimum. Ellas procuran er per la continuaziun da medaglias en il tennis per la Svizra, quella cuzza gia dapi il 2008.

RTR novitads 10:00

Artitgels legids il pli savens

Scrollar a sanestra Scrollar a dretga