Siglir tar il cuntegn

Header

video
La derniera da Dario Cologna a Lai e ses club da fans
Or da Telesguard dals 29.12.2021.
laschar ir
cuntegn

Tour de Ski – 2. etappa a Lai Cologna vegn 20avel tar sia derniera

Dario Cologna ha manchentà in exploit en sia davosa cursa da la cuppa mundiala en Svizra. En la segunda etappa dal Tour de Ski, ina cursa da 15 kilometers en il stil classic, è Cologna vegnì 20avel.

Il Jauer che parta a ses 14avel e davos Tour de Ski da la carriera ha er gì discletg tar sia derniera a Lai. El ha rut in bastun, quai ch’ha franà Cologna per ina plazza sut ils top 15. Tuttina ha quai tanschì per esser il meglier svizzer. Duas posiziuns davos Cologna è classà Jonas Baumann sco 22avel. Omadus passlungists rumantschs han pers passa ina minuta e mesa sin il victur Livo Niskanen.

audio
Dario Cologna suenter sia davosa cursa da la cuppa mundiala en Svizra
01:20 min, RTR Audio dals 29.12.2021.
laschar ir. Durada: 01:20 minutas.

Il Finlandais Niskanen che vala sco in dals gronds spezialists en il stil classic ha gudagnà cun in avantatg da 19 secundas sin il Russ Alexander Bolshunov. Cumplettà il podest sco terz cun in retard da 25 secundas ha il Norvegiais Paal Golberg. Sin plazza quatter è classà il dominatur da sprint, il Norvegiais Johannes Hösflot Kläbo. Tut ils auters svizzers han manchentà cleramain in plaz sut ils top 30.

audio
Jonas Baumann davart ses 22avel plaz en la cursa da 15 km stil classic
00:18 min, RTR Audio dals 29.12.2021.
laschar ir. Durada: 00:18 minutas.

Suenter in di da pausa cuntinuescha il Tour de Ski cun duas etappas ad Oberstdorf en Germania. A fin va il Tour de Ski en la Val di Fiemme. La davosa etappa maina lura ils 4 da schaner sin l’Alpe Cermis.

audio
Sascha Fliri, president dal Club da fans da Dario Cologna
01:27 min, RTR Audio dals 29.12.2021.
laschar ir. Durada: 01:27 minutas.

Organisaturs èn cuntents

Ils organisaturs a Lai èn cuntents cun las cursas. Las controllas hajan funcziunà e fin uss n'hajan gì nagins cas da corona, ha ditg Hannes Parpan, il president dal comité d'organisaziun envers RTR.

audio
Hannes Parpan «Nus essan cuntents»
00:18 min, RTR Audio dals 29.12.2021.
laschar ir. Durada: 00:18 minutas.

Surpendì sajan els dal dumber da visitaders. Las cifras da la prevendita na sajan betg stadas uschè bunas – tut auter saja il dumber d'aspectaturs alura stà ier.

Actualitad 17:00

Artitgels legids il pli savens

Scrollar a sanestra Scrollar a dretga