Siglir tar il cuntegn

Header

passlung
Legenda: Il sprint da notg ha procurà per in spectacul tut spezial. Keystone
cuntegn

Tour de Ski – sprint a Tavau Nagin happy end per ils Svizzers

Tar ils umens ha Valerio Grond procurà per il meglier resultat. Il spezialist da sprint da Tavau, il terz spert dal prolog, è dentant crudà ora en il mezfinal ed ha la finala stuì sa cuntentar cun il 7avel plaz. Er betg ì sco giavischà en il mezfinal èsi a Janik Riebli, il segund trumf svizzer da sprint. El è glischnà ora en ina storta a la fin da l’emprima da duas rundas uschia ch’el ha stuì sutterrar gia baud la qualificaziun per il final cun ils megliers sis. A fin gia suenter il quartfinal è la cursa stada per Roman Schaad ed Antonin Savary.

Gudagnà il sprint dals umens ha il Franzos Lucas Chanavat avant il Svedais Edvin Anger ed il Talian Federico Pellegrino. En il classament general resta a la testa il Norvegiais Harald Östberg Amundsen cun in avantatg dad 11 secundas sin ses cumpatriot Erik Valnes. Meglier svizzer è Beda Klee sco 7avel cun in retard da 1:17 minutas.

video
Tour de Ski a Tavau cun duas giuvnas speranzas grischunas
Or da Telesguard dals 03.01.2024.
laschar ir. Durada: 3 minutas 1 Secunda.

Final senza atletas svizras

A las dunnas svizras èsi ì sumegliant sco als umens. Er Nadine Fähndrich è vegnida franada en il mezfinal. La Lucernaisa che veva gudagnà la stagiun passada il sprint liber da la cuppa mundiala a Tavau ha uschia stuì sa cuntentar cun il 7avel plaz. Cuntenta cun il sprint dastga perencunter Alina Meier esser. La passlunghista da Tavau è vegnida per l’emprima giada insumma en in mezfinal ed è la finala classada sco 9avla, quai ch'è fin oz ses meglier resultat da la carriera.

audio
Andreas Wieland: «I regia in'atmosfera tut speziala cun quest sprint da notg»
ord Actualitad dals 03.01.2024. Maletg: Keystone
laschar ir. Durada: 5 minutas 29 Secundas.

Crudadas ora en il quartfinal è il trio svizzer cun Désirée Steiner da Tavau (18avla), Anja Weber (20avla) e Lea Fischer (24avla). Gia a fin suenter il prolog è la cursa tranter auter stada per Giuliana Werro. L’Engiadinaisa survegn dentant sia schanza en la segunda etappa a Tavau, ina cursa da distanza sur 20 kilometers en il stil classic.

audio
Co è stà il prolog, Giuliana Werro?
ord Actualitad dals 03.01.2024. Maletg: Keystone
laschar ir. Durada: 2 minutas 11 Secundas.

Il sprint liber da las dunnas ha gudagnà a moda suverana la Svedaisa Linn Svahn che veva gia persvadì en il prolog sco segunda. Cumplettà il podest han la Norvegiaisa Kristine Stavaas Skistad sco segunda l’Americana Jessie Diggins sco terza. Diggins resta uschia er a la testa dal classament general da quest Tour de Ski suenter quatter da set etappas. Nadine Fähndrich è actualmain sin il 11avel plaz cun in retard da 2:15 minutas.

RTR actualitad 17:00

Artitgels legids il pli savens