Siglir tar il cuntegn

Header

Giuliana Werro
Legenda: Giuliana Werro (24) ha gudagnà il 2023 il maraton da l'Engiadina. Keystone
cuntegn

Giuliana Werro «Jau poss emprender in mantun al Tour de Ski»

Il Tour de Ski, la cursa da pliras etappas mintgamai al cumenzament da l’onn, vala sco la pli dira cursa da passlung en la cuppa mundiala, cunzunt era pervia da l’etappa finala cun l’ascensiun sin l’Alpe Cermis en la Val di Fiemme.

Per l’emprima giada dastgà ir a la partenza a questa cursa da prestige, che Dario Cologna ha gudagnà quatter giadas, uschè savens sco nagin auter, ha quest onn era Giuliana Werro. L’Engiadinaisa da 24 onns è vegnida nominada da Swiss Ski grazia a sias bunas prestaziuns al cumenzament da la stagiun cun divers plazs da podest en il Continental Cup, l’Alpen Cup ed en cursas da la FIS. Fatg furora aveva Giuliana Werro gia al davos maraton da l’Engiadina. L’onn passà ha ella numnadamain gudagnà quest maraton da chasa ed uschia pudì prender cun ella a chasa las cornas da capricorn.

audio
Co è stà il prolog, Giuliana Werro?
ord Actualitad dals 03.01.2024. Maletg: Keystone
laschar ir. Durada: 2 minutas 11 Secundas.

L’experientscha è quai che quinta

Enfin questa stagiun era Giuliana Werro stada be trais giadas a la partenza a cursas da la cuppa mundiala, quai mintgamai a Tavau. Cun il Tour de Ski ha ella uss pudì far in ulteriur pass enavant en sia carriera. A las emprimas trais etappas dal Tour de Ski a Toblach en l’Italia na saja però betg ì sco giavischà, ella saja stada bler memia gnervusa, uschia l’Engiadinaisa avant las duas etappas a Tavau. Per las etappas da chasa ha ella cunzunt mess il focus sin l’etappa da persecuziun sur 20 kilometers classic che maina per l’emprima giada en la Val Dischma. Per l’etappa da sprint n’haja ella naginas finamiras, quai na saja betg sia disciplina. La devisa saja simplamain da dar tut e far il meglier pussibel en il prolog. Per cuntanscher il final cun las meglras 30 stuess Werro però mussar in grond exploit.

audio
Tour de Ski: Premiera per l'Engiadinaisa Giuliana Werro
ord Actualitad dals 03.01.2024. Maletg: Keystone
laschar ir. Durada: 3 minutas 43 Secundas.

Suenter las duas etappas da chasa a Tavau vegn Giuliana Werro a bandunar il Tour de Ski, quai è stà planisà uschia da Swiss Ski davent dal cumenzament. Il siemi saja dentant schon dad ina gia pudair terminar questa cursa da set etappas che va mintgamai a fin en la Val di Fiemme.

RTR actualitad 12:00

Artitgels legids il pli savens